Իրանի նախագահ Մասուդ Պեզեշկյանը հոկտեմբերի 16-ին կարճատև այցով կմեկնի Հայաստան։
Modern.az-ը հայտնում է, որ այս մասին հայտնել է Իրանի արտաքին գործերի նախարարության պաշտոնական ներկայացուցիչ Իսմայիլ Բաղային։
Նշվել է, որ Իրանի նախագահը կմասնակցի ՄԱԿ-ի Կենսաբանական բազմազանության մասին կոնվենցիայի կողմերի համաժողովի 17-րդ նստաշրջանին (COP17)։
Բաղայիի խոսքով՝ գագաթնաժողովի շրջանակներում նախատեսվում են նաև Պեզեշկյանի հանդիպումներն ու մտքերի փոխանակումը մի շարք երկրների ղեկավարների հետ, ովքեր կմասնակցեն միջոցառմանը։
Իրանի ԱԳՆ ներկայացուցիչն ընդգծել է, որ իր երկիրը եղել է կոնվենցիան առաջինը ստորագրող պետություններից և պաշտոնապես միացել է դրան 1996 թվականին։ Նրա խոսքով՝ վերջին 30 տարիների ընթացքում Իրանը կարևոր դեր է խաղացել կենսաբազմազանության և շրջակա միջավայրի պահպանության հետ կապված մեխանիզմների և կանոնների մշակման գործում։
Բաղային անդրադարձել է նաև Մերձավոր Արևելքի իրավիճակի հետևանքով Իրանի և ընդհանրապես տարածաշրջանի, այդ թվում՝ Պարսից և Օմանի ծոցերի շրջակա միջավայրին հասցված վնասներին։ Նա հայտարարել է, որ Թեհրանը կօգտագործի բոլոր հնարավորությունները՝ շրջակա միջավայրի դեմ կատարված հանցագործությունները փաստագրելու և միջազգային հանրության ուշադրությանը ներկայացնելու համար։
Հիշեցնենք, որ Հայաստանի արտաքին գործերի փոխնախարար Ռոբերտ Աբիսողոմյանն ավելի վաղ հայտարարել էր, որ Երևան է ժամանելու մոտ 50 երկրի ղեկավար։
ՄԱԿ-ի Կենսաբանական բազմազանության մասին կոնվենցիայի COP17 գագաթնաժողովը Երևանում կանցկացվի 2026 թվականի հոկտեմբերի 19-ից 30-ը։ Նախապատրաստական միջոցառումները և «Կանաչ գոտու» գործունեությունը կսկսվեն հոկտեմբերի 18-ին։
Հերթականության սկզբունքի համաձայն՝ COP ֆորումի հաջորդ նստաշրջանը պետք է անցկացվի Լատինական Ամերիկայի և Կարիբյան ավազանի երկրներից մեկում։ Հյուրընկալող երկիրը կընտրվի քվեարկությամբ։
