Azərbaycan Respublikasının Rusiya Federasiyasındakı Səfirliyinin təsərrüfat müdiri Həsən Səfər oğlu Hüseynov COVİD-19 virusuna yoluxması nəticəsində vaxtsız dünyasını dəyişib.
Modern.az xəbər verir ki, bu barədə Azərbaycanın Rusiyadakı səfiri Polad Bülbüloğlu məlumat verib.
"Həsən Hüseynov uzun müddət ərzində Xarici İşlər Nazirliyi sistemində, o cümlədən ölkəmizin Türkiyə Respublikası və Rusiya Federasiyasındakı səfirliklərində işləyib. Həmin dövrdə ona verilən bütün tapşırıqları layiqincə yerinə yetirən Həsən Hüseynov peşəkar olması ilə yanaşı, eyni zamanda yüksək insani keyfiyyətlərə də malik idi. O, həmkarlarının hörmət və rəğbətini qazanmış, hər zaman onların istər işlə bağlı, istərsə də şəxsi müraciətlərini cavabsız qoymayaraq hər cür köməklik göstərməyə çalışıb.
Həsən Hüseynov həm də gözəl ailə başçısı, qayğıkeş ata idi. Övladlarının layiqli böyümələri və yüksək səviyyədə təhsil almaları üçün onlara hər cür dəstək olub.
Azərbaycan Respublikasının Rusiya Federasiyasındakı Səfirliyinin kollektivi və şəxsən öz adımdan uzun illər ərzində mənimlə Moskva şəhərində çalışmış əziz Həsənin ailə üzvləri və yaxınlarına dərin hüznlə başsağlığı verir, Allahdan ona rəhmət diləyirəm!", - deyə səfir qeyd edib.
