Goranboyda “8 Noyabr-Zəfər Günü” ilə bağlı keçirilən ümumrayon tədbirləri çərçivəsində, Vətən müharibəsi iştirakçıları ilə görüş keçirildi.
Modern.az xəbər verir ki, tədbirdə rayon İcra Hakimiyyətinin başçısı Məhərrəm Quliyev, rayonun digər rəhbər şəxsləri, Səfərbərlik və Hərbi Xidmətə Çağırış üzrə Dövlət Xidməti rayon şöbəsinin rəhbərliyi və əməkdaşları, bir qrup Şəhid ailələri, Qazilər və ictimai fəallar iştirak ediblər.
Tədbirdə, Möhtərəm Prezidentimiz, Silahlı Qüvvələrin Müzəffər Ali Baş Komandanı cənab İlham Əliyevin rəhbərliyi ilə Rəşadətli Azərbaycan Ordusu tərəfindən torpaqlarımızın işğaldan azad edilməsi uğrunda həyata keçirdiyi və dünya hərb tarixinə qızıl hərflərlə yazılmış Şanlı Vətən Müharibəsi zamanı xalqımızın birliyi, şəhidlərimizin və qazilərimizin misilsiz qəhrəmanlığı və igidliyi sayəsində tarixi ədalətin bərpa olunduğunu vurğulayan İcra Başçısı Məhərrəm Quliyev dövlətimiz tərəfindən hər zaman Azərbaycanın mübariz övladlarının şücaətinin yüksək qiymətləndirildiyini və Goranboylu döyüşçülərimizin də müxtəlif Fəxri adlar, orden və medallarla, o cümlədən “Vətən müharibəsi iştirakçısı” medalı ilə təltif olunduğunu bildirdi.
Tədbirdə, Azərbaycan Respublikası Nazirlər Kabinetinin 2022-ci il 21 aprel tarixli Sərəncamı ilə təsdiq edilmiş “Vətən müharibəsi iştirakçısı” medalı ölkəmizin ərazi bütövlüyü uğrunda aparılmış döyüş əməliyyatlarında igidlik göstərən və döyüş tapşırıqlarını uğurla yerinə yetirən bir qrup Vətən müharibəsi iştirakçılarına təqdim edilib. Vətən müharibəsi iştirakçıları onlara göstərilən diqqət və qayğıya görə Dövlətimizin Rəhbərinə minnətdarlıqlarını bildiriblər.
