İlham Əliyev ilə Volodimir Zelenski arasında Bakıda keçirilən görüş və mətbuata verilən bəyanatlar Azərbaycan–Ukrayna münasibətlərinin yeni mərhələyə keçdiyini göstərir.
Modern.az mövzu ilə bağlı Milli Məclisin deputatlarının fikrini öyrənib.
Deputatlar münasibət bildirərək əməkdaşlığın müxtəlif istiqamətlər üzrə dərinləşdiyini vurğulayıblar.
Milli Məclisin deputatı Mehriban Vəliyeva hesab edir ki, son illərdə liderlər arasında təmasların intensivliyi əlaqələrin yüksək səviyyədə inkişaf etdiyini təsdiqləyir:
“Son dörd il ərzində yeddi görüşün keçirilməsi, o cümlədən beynəlxalq platformalarda davamlı dialoq siyasi münasibətlərin formal çərçivədən kənara çıxaraq real əməkdaşlıq mexanizmlərinə söykəndiyini təsdiqləyir.”
Deputatın sözlərinə görə, iki ölkə arasında münasibətlər yalnız siyasi dialoqla məhdudlaşmır, həm də möhkəm hüquqi baza üzərində qurulub:
“2008-ci ildə Kiyevdə və 2011-ci ildə Bakıda imzalanmış strateji tərəfdaşlıq sənədləri bu əlaqələrin institusional çərçivəsini formalaşdırıb.”
O, həmçinin energetika sahəsində əməkdaşlığın xüsusi rolunu qeyd edib:
“SOCAR-ın Ukraynada uzunmüddətli və uğurlu fəaliyyəti iki ölkə arasında iqtisadi inteqrasiyanın real nümunəsidir.”
Digər deputat Tahir Mirkişili isə bildirib ki, münasibətlər artıq iqtisadi baxımdan keyfiyyətcə yeni mərhələyə daxil olur. Onun fikrincə, siyasi dialoq iqtisadi əməkdaşlıq üçün mühüm zəmin yaradır:
“Davamlı siyasi təmaslar və qarşılıqlı etimad iqtisadi layihələrin reallaşmasını sürətləndirən əsas amillərdəndir.”
Deputat iqtisadi sahədə mövcud potensialın daha geniş olduğunu da diqqətə çatdırıb:
“Azərbaycanın enerji resursları və logistika imkanları ilə Ukraynanın sənaye və kənd təsərrüfatı potensialı arasında sinerji yaratmaq mümkündür.”
Onun sözlərinə görə, energetika sahəsi əməkdaşlığın əsas istiqamətlərindən biri olaraq qalır:
“SOCAR-ın Ukraynada uzun illərdir uğurla fəaliyyət göstərməsi bu əməkdaşlığın praktik və davamlı xarakter daşıdığını təsdiqləyir.”
Deputat əlavə edib ki, qarşılıqlı investisiyaların təşviqi və yeni layihələrin icrası əlaqələrin daha da genişlənməsinə imkan yaradacaq:
“Bu isə iqtisadi əlaqələrin yalnız ticarətlə məhdudlaşmayaraq investisiya əməkdaşlığı mərhələsinə keçdiyini göstərir.”
Qeyd edək ki, ekspertlər və deputatlar ümumi olaraq Azərbaycan–Ukrayna münasibətlərinin həm siyasi, həm də iqtisadi müstəvidə dərinləşdiyini və qarşıdakı dövrdə daha geniş əməkdaşlıq imkanlarının formalaşacağını vurğulayırlar.
