Mənzil böhranının həlli üçün bələdiyyələrarası əməkdaşlığın vacibliyi vurğulanıb.
Modern.az xəbər verir ki, bunu Marmara Bələdiyyələr Birliyinin Şəhər Siyasəti Mərkəzinin direktoru İrəm Korkmaz Bakıda keçirilən Ümumdünya Şəhərsalma Forumunun 13-cü sessiyası (WUF13) çərçivəsində “Mənzil təminatı şəhərləri bir araya gətirəndə: praktikada yerli əməkdaşlıq” adlı müzakirədə deyib.
Çıxışçı bildirib ki, mövcud şəraitdə əməkdaşlıq artıq seçim deyil, zərurətə çevrilib:
“Torpaq məhdud olduqda, resurslar azaldıqda və bələdiyyələr eyni vaxtda bir neçə böhranla üzləşdikdə heç bir şəhər problemlərin öhdəsindən təkbaşına gələ bilməz”.
Onun sözlərinə görə, əməkdaşlıq yalnız müzakirələrlə kifayətlənməməli, praktik mexanizmlərlə müşayiət olunmalıdır:
“Bələdiyyə strukturları yerli mənzil ehtiyaclarını maliyyələşdirilə və genişləndirilə bilən həllərə çevirməkdə mühüm rol oynaya bilər”.
İrəm Korkmaz qeyd edib ki, ilk mərhələdə etibarlı məlumat bazasının formalaşdırılması vacibdir:
“Mənzil ehtiyacları yalnız dəqiq müəyyənləşdirildikdə maliyyələşdirilə bilər. Bunun üçün hansı ərazilərin təsirləndiyi, infrastruktur məhdudiyyətlərinin nə olduğu və hansı növ mənzil həllərinə ehtiyac duyulduğu aydın bilinməlidir”.
O bildirib ki, bələdiyyə assosiasiyaları məlumatların toplanması və sistemləşdirilməsi prosesinə dəstək verə bilər:
“Bir çox bələdiyyələrin ciddi ehtiyacları olsa da, onları sübuta əsaslanan və strukturlaşdırılmış layihələr şəklində təqdim etmək üçün texniki imkanları olmur”.
Çıxışçı əlavə edib ki, ikinci mühüm məsələ maliyyələşməyə hazır layihə portfellərinin hazırlanmasıdır:
“Bələdiyyələrin çox zaman ideyaları və təcili ehtiyacları olur, lakin hazır layihələri olmur. Assosiasiyalar texniki-iqtisadi əsaslandırmaların hazırlanması, ekspertlərlə əlaqələrin qurulması və layihələrin maliyyə mexanizmlərinə uyğunlaşdırılmasında kömək edə bilər”.
İrəm Korkmaz vurğulayıb ki, mənzil siyasəti inteqrasiya olunmuş şəhərsalma ilə birlikdə nəzərdən keçirilməlidir:
“Mənzil məsələsinə yalnız yaşayış binalarının tikintisi kimi baxmaq olmaz. Bu məsələ ictimai nəqliyyat, infrastruktur, əsas xidmətlər, məşğulluq və ictimai məkanlarla əlaqəli şəkildə planlaşdırılmalıdır”.
O qeyd edib ki, Marmara Şəhər Forumunda (MARUF) aparılan müzakirələr də adekvat mənzil təminatının dayanıqlı şəhər inkişafı ilə birbaşa bağlı olduğunu göstərib.
