Azərbaycanın xarici bazarlara çıxardığı məhsullar arasında qızıl ilk sırada qərarlaşıb. Meyvə-tərəvəz, pambıq lifi, mineral gübrələr və müxtəlif sənaye məhsulları da ölkənin qeyri-neft ixracında mühüm yer tutur.
Modern.az xəbər verir ki, Dövlət Statistika Komitəsinin məlumatına əsasən, 2026-cı ilin yanvar-avqust aylarında Azərbaycanın xarici ticarət dövriyyəsi 33 milyard 934,9 milyon dollar təşkil edib. Bunun 22 milyard 511,5 milyon dolları ixracın, 11 milyard 423,4 milyon dolları isə idxalın payına düşüb.
Ötən ilin eyni dövrü ilə müqayisədə ixrac nominal ifadədə 36,2 faiz, real ifadədə isə 7,1 faiz artıb. Qeyri-neft-qaz ixracının nominal dəyəri 2,6 dəfə yüksəlib, real ifadədə artım 82,3 faiz olub.
Bəs Azərbaycan xaricə daha çox hansı qeyri-neft məhsullarını satır?
Dövlət Statistika Komitəsinin açıqladığı siyahıya əsasən, 2026-cı ilin ilk səkkiz ayında ixrac dəyərinə görə önə çıxan 10 məhsul bunlardır:
1. Qızıl
Azərbaycanın qeyri-neft ixracında ən böyük pay qızılın üzərinə düşür. İşlənməmiş və ya yarımemal olunmuş, yaxud toz şəklində olan qızılın ixracı ötən ilin eyni dövrü ilə müqayisədə nominal ifadədə 17,7 dəfə, real ifadədə isə 7,8 dəfə artıb. Bu, siyahıda ən diqqətçəkən göstəricilərdən biridir.
2. Təzə meyvə
Meyvə ixracı qeyri-neft sektorunun xarici bazarlarda gəlir gətirən əsas istiqamətlərindəndir. Yanvar-avqust aylarında 265,5 min ton təzə meyvə ixrac edilib. İxracın nominal dəyəri 16 faiz artsa da, real ifadədə 6 faiz azalma qeydə alınıb.
3. Təzə tərəvəz
Azərbaycanın xaricə satdığı əsas kənd təsərrüfatı məhsullarından biri də təzə tərəvəzdir. Hesabat dövründə 181,7 min ton tərəvəz ixrac olunub. Ötən ilin eyni dövrü ilə müqayisədə ixracın nominal dəyəri 11 faiz, real həcmi isə 9,3 faiz artıb.
4. Pambıq lifi
Pambıq Azərbaycanın ənənəvi ixrac məhsullarından biri olaraq qalır. İlk səkkiz ayda 103,3 min ton pambıq lifi xarici bazarlara göndərilib. İxracın nominal dəyəri 18,8 faiz, real həcmi isə 22,6 faiz artıb.
5. Mineral gübrələr
Siyahıda sənaye məhsullarından mineral gübrələr də yer alır. Yanvar-avqust aylarında bu məhsulun ixrac dəyəri 105,1 milyon dollar olub. Bununla belə, ötən ilin eyni dövrü ilə müqayisədə nominal ifadədə 8,5 faiz, real ifadədə isə 29,8 faiz azalma qeydə alınıb.
6. Polipropilen
Polipropilen kimya sənayesində istifadə olunan mühüm xammaldır. Hesabat dövründə Azərbaycanın bu məhsul üzrə ixracının dəyəri 98,5 milyon dollar təşkil edib. Ötən ilin eyni dövrü ilə müqayisədə nominal göstərici 15,1 faiz, real göstərici isə 19,6 faiz azalıb.
7. Şəkər
Şəkər də Azərbaycanın xaricə satdığı məhsullar arasındadır. İlk səkkiz ayda ixracın dəyəri 91,1 milyon dollar olub. Ötən ilin eyni dövrü ilə müqayisədə həm nominal dəyərdə, həm də real həcmdə 2,3 dəfə artım qeydə alınıb.
8. Polietilen
Sənaye və qablaşdırma sahələrində geniş istifadə olunan polietilen Azərbaycanın qeyri-neft ixracında yer tutan digər məhsuldur. Yanvar-avqust aylarında bu məhsuldan 67 min tona yaxın ixrac edilib. İxracın nominal dəyəri 24,2 faiz, real həcmi isə 27,8 faiz azalıb.
9. Emal olunmamış alüminium
Metallurgiya məhsulları da ixrac siyahısında təmsil olunur. Hesabat dövründə emal olunmamış alüminiumun ixrac dəyəri 56,7 milyon dollar təşkil edib. Ötən ilin eyni dövrü ilə müqayisədə nominal dəyər 20,1 faiz, real həcm isə 36,5 faiz azalıb.
10. Siqaretlər
İlk onluğun sonuncu pilləsində siqaretlər qərarlaşıb. Yanvar-avqust aylarında 2 milyard 257,6 milyon ədəd siqaret ixrac olunub. Ötən ilin eyni dövrü ilə müqayisədə ixracın nominal dəyəri 37,6 faiz, real həcmi isə 29,2 faiz artıb.
A.Qorxmaz
