Tərtər Peşə Məktəbinə inzibati-təsərrüfat işləri üzrə yeni direktor müavini təyin edilib.
Modern.az xəbər verir ki, bu barədə Peşə Təhsili üzrə Dövlət Agentliyinin direktoru İlqar Bayramlı əmr imzalayıb.
Əmrə əsasən, bu vəzifəyə Bəhruz Nəzərov gətirilib.
Qeyd edək ki, Bəhruz Nəzərov 2003-cü ildə Kənd Təsərrüfatı Akademiyasında “İpəkçilik” ixtisası üzrə bakalavriat, 2005-ci ildə isə həmin təhsil müəssisəsində “Biologiya və kənd təsərrüfatı əsasları” ixtisası üzrə magistratura təhsili alıb.
2022-ci ildə “Seleksiya və toxumçuluq” ixtisası üzrə aqrar elmlər sahəsində fəlsəfə doktoru elmi dərəcəsinə layiq görülüb.
Əmək fəaliyyətinə Laçın rayonu əsaslı kənd orta məktəbində biologiya müəllimi kimi başlayıb. Daha sonra Kənd Təsərrüfatı Nazirliyinin Əkinçilik Elmi-Tədqiqat İnstitutunun Tərtər bölgə Təcrübə Stansiyasında elmi işçi, Becərmə texnologiyası şöbəsinin müdiri vəzifələrində çalışıb.
Fəaliyyəti dövründə Tərtər Regional Aqrar Elm və İnnovasiyalar Mərkəzində, Aqrar Xidmətlər Agentliyinin Bərdə Regional Təlim Mərkəzində direktor, Ağdam Dövlət Aqrar İnkişaf Mərkəzində direktor müavini və maliyyə-təsərrüfat sektorunun müdiri, eləcə də Aqrar Xidmətlər Agentliyinin Laboratoriya, Ekspertiza və Sertifikatlaşdırma Mərkəzinin Bərdə Regional Mərkəzində direktor vəzifələrində çalışıb.
2024-cü ildən etibarən Bərdə Dövlət Peşə Təhsil Mərkəzində Təhsilalanlarla iş şöbəsinin işəgötürənlərlə iş üzrə mütəxəssisi kimi fəaliyyət göstərib, eyni zamanda “Aqronom texnik” ixtisası üzrə qısamüddətli kurslarda təlimçi müəllim kimi çalışıb.
