Azərbaycan Respublikasının Prezidenti cənab İlham Əliyevin müdrik rəhbərliyi ilə həyata keçirilən ardıcıl islahatlar nəticəsində ölkəmizdə bütün istiqamətlərlə yanaşı, rəqəmsallaşma sahəsində də mühüm inkişaf təmin olunub. Bu xüsusda, son illər informasiya-kommunikasiya texnologiyalarının tətbiqinin genişləndirilməsi, elektron hökumət xidmətlərinin inkişafı, innovasiya ekosisteminin formalaşdırılması və süni intellekt texnologiyalarının tətbiqi istiqamətində həyata keçirilən tədbirləri qeyd etmək istərdim. Bütün bunlar təbii ki, Azərbaycanın rəqəmsal transformasiya sahəsində yeni inkişaf mərhələsinə qədəm qoyduğunu nümayiş etdirir.
Dövlətimizin başçısı tərəfindən cari ilin fevralında təsdiq olunan "Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı"na nəzər saldıqda da görürük ki, rəqəmsallaşma ölkəmizdə milli iqtisadiyyatın rəqabət qabiliyyətinin yüksəldilməsi, dövlət idarəçiliyinin səmərəliliyinin artırılması, innovasiya əsaslı iqtisadi modelin formalaşdırılması və milli təhlükəsizliyin möhkəmləndirilməsi baxımından əsas strateji inkişaf alətlərindən biri kimi qəbul olunur.
Prezident İlham Əliyevin sədrliyi ilə fevral ayında keçirilən müşavirədə rəqəmsal inkişaf sahəsində yeni idarəetmə modelinin formalaşdırılması istiqamətində mühüm qərarlar qəbul olundu, Azərbaycan Respublikasının Rəqəmsal İnkişaf Şurası yaradıldı. Şuranın təsis edilməsi dövlət qurumları arasında koordinasiyanın gücləndirilməsinə, vahid rəqəmsal siyasətin həyata keçirilməsinə və innovasiya əsaslı iqtisadi inkişaf modelinə keçidin sürətləndirilməsinə mühüm töhfədir.
Azərbaycan Respublikasının Birinci vitse-prezidenti Mehriban xanım Əliyevanın sədrliyi ilə keçirilən Rəqəmsal İnkişaf Şurasının ilk iclasında Fəaliyyət Planının icra vəziyyəti, qanunvericilik islahatları, təhsil sisteminin rəqəmsallaşdırılması, innovasiya ekosisteminin inkişafı və kibertəhlükəsizlik sahəsində görülən işlərnəzərdən keçirildi. Əlbəttə ki, Rəqəmsal İnkişaf Şurası islahatların sistemli, koordinasiyalı və nəticəyönümlü şəkildə həyata keçirilməsi üçün mühüm institusional platforma kimi böyük əhəmiyyət kəsb edir.
Fəaliyyət Planında rəqəmsal dövlət modelinin formalaşdırılmasına kompleks yanaşma tətbiq edilir. Belə ki, "mygov" və "mygov Biznes" platformalarının vahid rəqəmsal ekosistem kimi inkişaf etdirilməsi, müxtəlif dövlət qurumlarının xidmətlərinin bu platformalarda cəmləşdirilməsi, proaktiv xidmətlərin genişləndirilməsi və "Yalnız bir dəfə" prinsipinin tətbiqi dövlət-vətəndaş münasibətlərini tamamilə yeni keyfiyyət mərhələsinə yüksəldəcək. Vətəndaşların dövlət xidmətlərindən istifadəsinin sadələşdirilməsi, bürokratik prosedurların minimuma endirilməsi və xidmətlərin avtomatlaşdırılması idarəetmədə şəffaflığın və operativliyin artırılmasına mühüm töhfə verəcək.
Diqqət çəkən mühüm məqamlardan biri də dövlət məlumatlarının vahid platformada idarə olunmasını nəzərdə tutan Milli Məlumat Hövzəsinin yaradılmasıdır. Bu sistem dövlət informasiya ehtiyatlarının inteqrasiyasını təmin etməklə yanaşı, analitika və süni intellekt texnologiyalarının tətbiqi nəticəsində vətəndaşlara fərdiləşdirilmiş və proaktiv xidmətlərin göstərilməsinə imkan verəcək. Beləliklə, rəqəmsallaşma yalnız texniki yenilənmə deyil, qərar qəbuletmə prosesinin daha səmərəli, çevik və məlumatlara əsaslanan modelə keçidini təmin edəcək.
Ümumilikdə isə "Azərbaycan Respublikasında rəqəmsal inkişafın sürətləndirilməsinə dair 2026–2028-ci illər üçün Fəaliyyət Planı" ölkədə rəqəmsal transformasiya prosesinin sistemli şəkildə həyata keçirilməsini təmin edən strateji dövlət sənədidir. Sənədin icrası dövlət idarəçiliyinin səmərəliliyinin yüksəldilməsinə, innovasiya əsaslı iqtisadi inkişaf modelinin formalaşdırılmasına, milli texnoloji potensialın gücləndirilməsinə, kibertəhlükəsizliyin təmin edilməsinə və insan kapitalının inkişafına mühüm töhfə verəcək.
Şahin İsmayılov
Milli Məclisin komitə sədri
