ԱՊՀ անդամ երկրների պաշտպանության նախարարների խորհրդի նիստը կանցկացվի Ղրղզստանում։
Modern.az-ը հայտնում է, որ ՌԴ պաշտպանության նախարարության տարածած տեղեկատվության մեջ Հայաստանը չի նշվել մասնակից երկրների թվում։
ՌԴ պաշտպանության նախարար Անդրեյ Բելոուսովը աշխատանքային այցով մեկնել է Չոլպոն-Աթա քաղաք, որտեղ տեղի կունենա հանդիպումը։
Ռուսական ռազմական գերատեսչության հայտարարության համաձայն՝ միջոցառմանը նախատեսվում է Ադրբեջանի, Բելառուսի, Ղազախստանի, Ղրղզստանի, Ռուսաստանի, Տաջիկստանի և Ուզբեկստանի պատվիրակությունների, ինչպես նաև ԱՊՀ պաշտպանության նախարարների խորհրդի քարտուղարության ներկայացուցիչների մասնակցությունը։
Հանդիպմանը նախատեսվում է քննարկել Համագործակցության շրջանակներում ռազմական համագործակցության զարգացման արդիական հարցեր, ինչպես նաև համաձայնեցնել ԱՊՀ երկրների զինված ուժերի 2027 թվականի համատեղ միջոցառումների պլանը։
Հանդիպման շրջանակներում Անդրեյ Բելոուսովը երկկողմ բանակցություններ կվարի նաև մասնակից երկրների ռազմական գերատեսչությունների ղեկավարների հետ։ Բացի այդ, ՌԴ պաշտպանության նախարարը նախատեսում է այցելել Ղրղզստանի տարածքում գտնվող ռուսական ռազմական օբյեկտներ։
ՌԴ պաշտպանության նախարարությունը նշել է, որ հանդիպումը կազմակերպվում է որպես ՌԴ նախագահ Վլադիմիր Պուտինի մասնակցությամբ ԱՊՀ գագաթնաժողովում ձեռք բերված պայմանավորվածությունների շարունակություն։
