Armaniston Bosh vaziri Nikol Pashinyan Ozarbayjonning Karki qishlog‘ini delimitatsiya jarayoni doirasida qaytarish masalasiga munosabat bildirdi.
Modern.az Armaniston OAVlariga tayanib xabar berishicha, Pashinyan armanlar “Tigranashen” deb ataydigan aholi punkti mavjudligini davom ettirishini, ammo uning qayerda joylashishi boshqa masala ekanligini aytdi.
“Tigranashen” aholi punkti bo‘ladi, ammo qayerda – bu boshqa savol”, – dedi Armaniston Bosh vaziri.
Pashinyan yana bir bor ta’kidladiki, Armanistonning xalqaro miqyosda tan olingan 29 743 kvadrat kilometr hududiga Karki va Ozarbayjonning boshqa anklavlari kirmaydi. Uning so‘zlariga ko‘ra, bu hududga Armanistonning Ozarbayjondagi anklavi bo‘lgan Bashkend kiradi.
Armaniston Bosh vaziri Karkining Ozarbayjonga qaytarilishiga yo‘l qo‘ymasliklarini aytgan kuchlarni urushga undashda aybladi:
“Biz yo‘l qo‘ymaymiz” deganlar urushga undamoqda. Masalaning qanday hal qilinishi boshqa mavzu. Faktning tasdiqlanishi bir narsa, uning hududda qanday hal qilinishi esa boshqa narsa”.
Pashinyan avvalroq ham xaritalarga ko‘ra Karkining Armaniston hududi emasligini ma’lum qilgan edi. U anklavlar bilan bog‘liq masalalar delimitatsiya va tinchlik jarayoni doirasida hal qilinishi kerakligini aytgan edi.
Qayd etish joizki, Karki Ozarbayjon Respublikasi Naxchivan Avtonom Respublikasining Sadarak tumaniga tegishli anklav qishloqdir. Qishloq 1990-yildan beri Armaniston nazorati ostida.
