Oʻzbekistonning Qashqadaryo viloyati Kitob tumanida Ozarbayjon bilan hamkorlikda oltin qazib olish loyihasi boshlanmoqda.
Modern.az Oʻzbekiston Prezidenti matbuot xizmatiga tayanib xabar berishicha, bu haqda Shavkat Mirziyoyevning 21-oktabr kuni viloyatga tashrifi chogʻida maʼlum qilingan.
Tashrif doirasida umumiy qiymati 6 milliard dollardan ortiq boʻlgan 161 ta loyiha taqdim etildi. Ulardan 69 tasi foydalanishga topshirildi, yana 92 ta obyekt qurilishiga start berildi.
Mirziyoyevning taʼkidlashicha, soʻnggi besh yilda Qashqadaryoga 20 trillion soʻm mablagʻ yoʻnaltirilgan, 7 milliard dollar xorijiy investitsiya jalb qilingan. Bu davrda viloyatda aholi jon boshiga toʻgʻri keladigan daromad uch barobar oshgan.
“2027-yil zamonaviy sanoat va agrotexnologiyalar asosida Qashqadaryo rivojlanish yili boʻladi”, – deya taʼkidladi Oʻzbekiston Prezidenti.
