Armaniston tashqi ishlar vaziri Ararat Mirzoyan Turkiya bilan chegarada joylashgan "Margara" nazorat-oʻtkazish punkti bilan tanishdi.
Modern.az xabar berishicha, bu haqda Armaniston Tashqi ishlar vazirligi matbuot xizmati maʼlum qildi.
Qayd etilishicha, Mirzoyan bilan birga nazorat-oʻtkazish punktida xorijda akkreditatsiyadan oʻtgan Armaniston diplomatik vakolatxonalari rahbarlari ham boʻlgan.
Tashrif davomida Armaniston Davlat daromadlari qoʻmitasi rahbari Eduard Akopyan nazorat-oʻtkazish punktini taʼmirlash va jihozlash boʻyicha amalga oshirilgan ishlar natijalarini taqdim etdi. Uning taʼkidlashicha, "Margara" nazorat-oʻtkazish punkti toʻliq foydalanishga tayyor.
Eslatib oʻtamiz, chegara Anqara tomonidan 1993-yildan beri yopilgan. Mamlakatlar oʻrtasidagi munosabatlarning keskinlashishiga Anqaraning Ozarbayjonning Qorabogʻ masalasidagi pozitsiyasini qoʻllab-quvvatlashi va Usmonli imperiyasida 1915-yilgi voqealarning arman genotsidi sifatida xalqaro miqyosda tan olinishi jarayoniga Turkiyadan qattiq reaksiya kabi bir qator omillar sabab boʻlgan.
2022-yil yanvar oyida Moskvada Armaniston-Turkiya munosabatlarini normallashtirish jarayoni boʻyicha maxsus vakillarning birinchi uchrashuvi boʻlib oʻtdi. Oʻshanda Armaniston parlamenti vitse-spikeri Ruben Rubinyan va Turkiyadan AQShdagi sobiq elchi Serdar Kilich uchrashgan edi. Keyinchalik Venada ham bir qator uchrashuvlar oʻtkazildi.
2022-yil 1-iyul kuni Venada Rubinyan va Kilich oʻrtasida boʻlib oʻtgan uchrashuvda uchinchi davlat fuqarolari, shuningdek, diplomatik pasport egalarining Armaniston-Turkiya quruqlik chegarasidan oʻtishiga sharoit yaratish boʻyicha kelishuvga erishildi. Biroq bu kelishuv hali amalga oshirilmagan.
