Xüsusi karantin rejimində həyat fəaliyyətinin təmin edilməsi baxımından zəruri hesab olunan sahələrdə çalışan vətəndaşların daşınmasını təmin etmək məqsədi ilə müntəzəm və ekspress xətt avtobuslarının fəaliyyəti davam etdirilir.
Modern.az-ın məlumatına görə, bunu bu gün keçirilən onlayn mətbuat konfransında Bakı Nəqliyyat Agentliyinin mətbuat katibi Mais Ağayev bildirib.
M.Ağayev qeyd edib ki, müntəzəm xətlərlə yanaşı, 7 ekspres xətt üzrə əlavə 100 ədədə yaxın avtobus sərnişindaşıma prosesinə cəlb edilir:
“80 ədədə qədər avtobus isə ehtiyat olaraq müvafiq metro stansiyalarının ətrafında saxlanılır. Daşımaların tənzimlənməsi və orataya çıxan məsələlərin təcili həlli məqsədi ilə Bakı Nəqliyyat Agentliyinin mobil qrupları tərəfindən ərazidə nəzarət tədbirləri həyata keçirilir”.
BNA rəsmisinin sözlərinə görə, görülən bütün zəruri tədbirlərə baxmayaraq hələ də xüsusi ilə səhər və axşam daşımalarında avtobuslarda sərnişin axını çoxluq təşkil edir:
01.04.2020 614.142 sərnişin
02.04.2020 576.504 sərnişin
03.04.2020 554.652 sərnişin
04.04.2020 490.230 sərnişin
05.04.2020 177.209 sərnişin
06.04.2020 378.106 sərnişin
07.04.2020 394.071 sərnişin
08.04.2020 420.705 sərnişin
09.04.2020 424.051 sərnişin
Daşımalara dair statistik məlumatlara əsasən də yalnız aprelin 5-də sərnişin sayında kəskin azalma müşahidə olunub. Ötən gün isə aprelin 8-i ilə müqayisədə təxminən 24 mindənçox sərnişin artımı qeydə alınıb”.
M.Ağayev deyib ki, icra olunan sərnişindaşıma prosesi o cümlədən də avtobuslararası interval və iş qrafiki adi günlərdən fərqli olaraq məhz xüsusi karantin rejimi ilə icra olunur:
“Sərnişinlərimizdən də hazırki daşımaları məhz bu cür qəbul etmələrini və davranışlarını mövcud vəziyyətə uyğun tənzimləmələrini xahiş edirik. Mövcud epidemik vəziyyətdə sosial məsafənin saxlanılmasının vacibliyini nəzərə alaraq avtobuslarda və dayanacaq məntəqələrində növbəlilik prinsipinə, sosial məsafəyə riayət edilməlidir”.
