Rusiyada keçirilən parlament seçkilərinin nəticələri Prezident Vladimir Putin üçün Ukraynadakı müharibənin davam etdirilməsinə ictimai dəstəyin göstəricisi kimi təqdim oluna bilər.
Modern.az xəbər verir ki, bu barədə Reuters yazıb.
Rusiyada 18-20 sentyabr tarixlərində üçgünlük parlament seçkiləri keçirilir. Hakim “Vahid Rusiya” Partiyasının Dövlət Dumasında üstünlüyünü qoruyacağı gözlənilir. Reuters qeyd edir ki, müharibəyə qarşı çıxan namizədlərin əksəriyyəti seçkilərə buraxılmayıb.
Agentliyin təhlilinə görə, Putin seçkiləri Ukraynadakı hərbi əməliyyatlara dəstəyin göstəricisi kimi təqdim etdiyindən, səsvermənin nəticələrindən əhalinin müharibənin əsas məqsədlərinə çatana qədər davam etdirilməsini dəstəklədiyini bildirmək üçün istifadə edə bilər.
Reuters yazır ki, seçkilər Kremlə ölkədə həyatın əvvəlki qaydada davam etdiyi görüntüsünü yaratmaq baxımından da əhəmiyyətli ola bilər. Müharibə şəraitində ölkənin 11 saat qurşağında parlament seçkilərinin keçirilməsi hakimiyyət tərəfindən siyasi və ictimai sabitliyin göstəricisi kimi təqdim edilə bilər.
Materialda Rusiya və Ukrayna arasında seçkilərlə bağlı müqayisəyə də diqqət çəkilir. Putin dəfələrlə Ukraynada prezident seçkilərinin keçirilməməsini tənqid edib. Ukraynada isə 2022-ci ildən tətbiq olunan hərbi vəziyyət dövründə seçkilərin keçirilməsinə qanunvericilik imkan vermir. Reuters-in fikrincə, Moskva Rusiyada seçkilərin müharibəyə baxmayaraq keçirilməsindən siyasi arqument kimi istifadə edə bilər.
Agentlik mümkün yeni səfərbərlik məsələsinə də toxunub. Putin sentyabr ayında seçkilərdən sonra yeni səfərbərlik keçirilə biləcəyi barədə Ukrayna və Qərb mediasında səslənən iddiaları “cəfəngiyat” adlandırıb.
Bununla belə, müharibəni tənqid edən bəzi Rusiya və xarici analitiklər seçkilərin nəticələrinin gələcəkdə belə bir qərarın əsaslandırılması üçün istifadə oluna biləcəyindən narahat olduqlarını bildiriblər. Reuters vurğulayır ki, hazırda Rusiya hakimiyyəti seçkilərdən sonra səfərbərlik elan ediləcəyini təsdiqləməyib.
Nəşr həmçinin qeyd edir ki, bəzi tənqidçilər seçkilər başa çatdıqdan sonra ölkə daxilində nəzarət və məhdudlaşdırıcı tədbirlərin sərtləşdirilə biləcəyindən ehtiyat edirlər. Bununla bağlı konkret qərar isə açıqlanmayıb.
