Oktyabrın 11-dən Türkiyədə səfərdə olan Azərbaycan Milli Məclisinin 11 deputatından ibarət nümayəndə heyəti Ankarada keçirdiyi görüşləri sona çatdırıb. Modern.az xəbər verir ki, oktyabrın 16-da nümayəndə heyəti Ankarada səfərin yekunlarına dair mətbuat konfransı keçirib. Xatırladaq ki, Milli Məclisinin üzvləri Səməd Seyidov, Nizami Cəfərov, Əli Hüseynov, Qənirə Paşayeva, Mübariz Qurbanlı, Qüdrət Həsənquliyev, Əkrəm Abdullayev, Gültəkin Hacıbəyli, Asəf Hacıyev, Rövşən Rzayev, Fəzail Ağamalıdan ibarət nümayəndə heyəti Türkiyə və Ermənistanın arasında münasibətlərin yaxşılaşdırılmasına və sərhədlərin açılmasına dair protokollar imzalanandan sonra Ankaraya gedib. Deputatlarımız protokollar imzalanandan sonra yaranmış mövcud vəziyyəti daha dərindən öyrənmək və Azərbaycanın narahatlığını çatdırmaq məqsədilə Türkiyədə bir sıra görüşlər keçiriblər.
Ankara səfərinin yekunlarına dair keçirilən mətbuat konfransında Azərbaycan Parlamentinin Beynəlxalq münasibətlər və parlamentlərarası əlaqələr komitəsinin sədri, Avropa Şurası Parlament Assambleyasının (AŞ PA) vitse-prezidenti Səməd Seyidov bildirib ki, onlar Türkiyədə keçirdikləri görüşləri konstruktiv sayırlar: “Məqsədimiz Ankara-Yerevan protokollarına etiraz deyil, Türkiyəyə Azərbaycan tərəfinin bu məsələdən narahat olduğunu çatdırmaq və işğalçı dövlətlə əlaqələrin doğura biləcəyi nəticələri bildirmək idi". S.Seyidov deyib ki, Türkiyənin Baş naziri ilə keçirilən görüş zamanı Rəcəb Tayyib Ərdoğan azərbaycanlı millət vəkillərinə konkret narahatlığa heç bir əsas olmadığını bildirib: "Ərdoğanla görüşümüz zamanı Baş nazir Ermənistanın işğalı altında olan Azərbaycan torpaqları azad edilməyənə qədər protokolların təsdiq edilməyəcəyini bildirdi". Səməd Seyidovun sözlərinə görə, Türkiyə Böyük Millət Məclisinin sədri ilə görüş zamanı da Mehmet Əli Şahin Azərbaycanın maraqlarına zidd sənədin ölkə parlamentində təsdiq edilməyəcəyini diqqətə çatdırıb. Səməd Seyidov Türkiyə-Ermənistan arasında oynanılan futbol matçından əvvəl Azərbaycan bayrağı ilə başlı məsələ barəsində də fikrini bildirib: “Azərbaycan bayrağının Türkiyə-Ermənistan matçında təhqir edilməsi məsələsi ilə bağlı narahatlığımızı Türkiyə Parlamentinin Xarici əlaqələr komissiyasının rəhbərlərinə çatdırmışıq. Azərbaycan tərəfi Türkiyədən bu hadisənin araşdırılmasını və günahkarların tapılıb cəzalandırmasını istəyib. Azərbaycan tərəfi Türkiyədən məsələ ilə bağlı cavab gəzləyir. Azərbaycanda Türkiyənin bayrağına böyük hörmət edilir və qarşı tərəfdən də bu hörmət istənilir. Azərbaycan vəTürkiyə arasında əlaqələrə xələl gətirmək istəyən bəzi qüvvələr var. Bayrağın təhqir olunması da məhz bu qüvvələrin məkirli planlarına xidmət edir".
Millət vəkilləri Qüdrət Həsənquliyev və Fəzail Ağamalı da bildiriblər ki, protokollar parlamentdə ratifikasiya olunarsa, Türkiyə və Azərbaycan arasında dostluq və strateji əməkdaşlıq bitər. Onlar
protokolların parlamentdə ratifikasiya olunmayacağına ümid etdiklərini deyiblər.
