“Kimlər ki, uşaqlarına biganə deyil, vaxtında məktəbli formalarını alır. Məktəblərin açılması ilə bağlı dünənki qərara qədər də müraciət edənlər var idi, amma düşünürəm ki, qarşıdakı günlərdə tələbat artacaq”.
Bunu Modern.az-a “Bakı Tikiş Evi”nin (BTE) satış şöbəsinin rəisi Etibar Əzimov bildirib.
E.Əzimov qeyd edib ki, BTE-nin kifayət qədər xammal ehtiyatı var:
“Həmişəki kimi xammalı Türkiyədən almışıq. Tələbat artdıqca, əməkdaşlarımız, dərzilərimiz yeni formaların hazırlanmasını həyta keçirəcək. Bu baxımdan heç bir çətinliyimiz yoxdur”.
Onun sözlərinə görə, hazırda BTE-nin mağazalarında bütün ölçülərdə məktəbli formaları satışdadır.
Qiymətlərə gəlincə, satış rəisi hər hansı dəyişikliyin olmadığını vurğulayıb:
“I-VI siniflər üçün nəzərdə tutulan 26-44 ölçülü məktəbli formalarının qiyməti 40 manat, yuxarı ölçülər isə 46 manat təşkil edir. Bakı Tikiş Evində məktəbli köynəkləri də tikilir. 26-54 ölçülü bütün köynəklərin qiyməti 8 manatdır. Köynəklərin tikilməsi üçün istifadə edilən pambıq parçalar Türkiyədən gətirilir. Məktəblilər üçün nəzərdə tutulan jiletlər də ölçüsündən asılı olmayaraq 8 manata satılır. Geyimlərin keyfiyyətinə ən azı bir il zəmanət veririk”.