Əliməmməd Nuriyev İctimai Komitənin yeni koordinatoru seçilib | Modern.az

Penitensiar sistemdə ictimai nəzarəti həyata keçirilməsi məqsədilə 2006-cı ildən müstəqil qurum - İctimai Komitə fəaliyyət göstərir. Bu müddət ərzində Komitə tərəfindən penitensiar müəssisələrə müntəzəm olaraq 260-dan artıq sərbəst başçəkmələr edilib, nəticələri üzrə tövsiyə və hesabatlar təqdim olunub, bununla bağlı zəruri tədbirlər görülüb.

Modern.az-ın məlumatına görə, ictimaiyyət nümayəndələrindən ibarət olan Seçki Komissiyası tərəfindən yenicə formalaşdırılmış İctimai Komitənin fevralın 11-də yeni tərkibdə ilk iclası keçirilib. İclasda qurumun son bir illik fəaliyyəti dövründə görülmüş işlər müzakirə olunub, hüquq-müdafiəçisi Əliməmməd Nuriyev qurumun koordinatoru seçilib.

Tədbirə qatılan ədliyyə naziri Fikrət Məmmədov ölkə Prezidenti İlham Əliyevin tapşırıqlarına əsasən penitensiar sistemdə gedən köklü dəyişikliklərdən, o cümlədən məhkumların hüquqlarının təmin olunması, saxlanma şəraitinin müasirləşdirilməsi, bu sahədə şəffaflığın və ictimai nəzarətin artırılması, islah işi üzrə görülən tədbirlərdən danışıb.
 
Nazir korrupsiyaya qarşı daha da ciddi mübarizənin aparılması ilə bağlı dövlət başçısının tapşırıqlarını vurğulayaraq, bu günlərdə regionlara səfəri zamanı söyləmiş fikirlərini xatırladıb, rüşvətxorluq və digər neqativ hallarla mübarizədə vətəndaş cəmiyyətinin təmsilçisi olan İctimai Komitənin rolunu xüsusi qeyd edib.

İclasda Komitə üzvləri göstərilən etimadı yüksək qiymətləndirərək, daim rotasiya prinsipi əsasında fəaliyyət göstərən Komitənin davamlı penitensiar islahatlara səmərəli töhfə verəcəyini bildirmiş, məhkumların asudə vaxtlarının səmərəli təşkili, məşğulluğunun artırılması, psixoloji yardımın yaxşılaşdırılması və digər məsələlərlə bağlı konkret təkliflər irəli sürüblər.

Tədbirin sonunda ədliyyə naziri İctimai Komitə üzvlərinə cəzaçəkmə müəssisələrinə maneəsiz buraxılması üçün xüsusi vəsiqələr təqdim etmiş və uğurlu fəaliyyət arzulayıb.

İctimai Komitənin yeni tərkibi