“Azərbaycanın öz torpaqlarını Ermənistanın işğalından azad etməsi istiqamətində ciddi cəhdlərinə baxmayaraq, bu istiqamətdə heç bir irəliləyiş yoxdur. Ermənistan yenə də öz destruktivliyi ilə bu məsələni uzatmağa çalışır”. Modern.az saytına açıqlamasında Xankəndindən olan millət vəkili, “Ayna” Qaçqın və Məcburi Köçkün Qadınlar Ictimai Birliyinin sədri Həvva Məmmədova bildirib ki, torpaqlarımızın işğal altında olduğu müddətdə artıq bir nəsil dünyasını dəyişib: “Bu, çox agrılı məqamdır. Özü də bu adamların hər biri vətən nisgili ilə dünyalarını dəyişiblər. Onların hər biri bütün varlıqları ilə işğal altında olan torpaqlara baglı idilər. Düşünürəm ki, onları itirməklə biz həm də bir qədər Vətənə olan bağlılığı itiririk. Kim nə deyir desin, yaşlı insanlarla gənc nəslin o yerlərə baglılığı eyni deyil”.
Deputat beynəlxalq dünyanın bu məsələdə mövqeyindən də narazıdır: “Bunu təkrarlamağa ehtiyac duymuram. Ancaq beynəlxalq dünyanın diqqətini bu məsələyə çəkmək üçün “Ayna” Qaçqın və Məcburi Köçkün Qadınlar Birliyi 2010-cu ildə 7-dən artıq ölkədə böyük bir kampaniyaya başlayacaq”.
