Azərbaycan Respublikasının Avropa Şurasının “Kibercinayətkarlıq haqqında” Konvensiyasına qoşulması ilə əlaqədar Avropa Komissiyasının Texniki Yardım Mübadilə Qurumu (Technical Assistance Information Exchange Instrument of the European Commission (TAIEX)) tərəfindən noyabrın 24-25-də Bakıda “Kibercinayətkarlığa qarşı mübarizə” mövzusunda seminar təşkil olunacaq.
Rabitə və İnformasiya Texnologiyaları Nazirliyindən Modern.az-a verilən məlumata görə, tədbir Avropa Şurasının tövsiyyəsi və Avropa Hüquq Akademiyasının ekspertlərinin iştirakı ilə keçiriləcək.
Avropa dövlətlərində bu sahədə Avropa qanunvericiliyinin tətbiq olunmasının qiymətləndirilməsi və kibercinayətkarlığa qarşı Avropa miqyasında effektiv mübarizə formalarının və üsullarının perspektivinin müəyyənləşdirilməsi baxımından Bakıda təşkil olunan seminar çox aktual hesab olunur.
Tədbir zamanı kibercinayətkarlığa qarşı mübarizə sahəsində qəbul edilmiş Avropa Şurasının “Kibercinayətkarlıq haqqında” 2001-ci il Konvensiyası, “İnformasiya sistemlərinə qarşı hücumlar” və “Uşaqların cinsi istismarına qarşı və uşaq pornoqrafiyası ilə mübarizə” Çərçivə Qərarları kimi Avropa hüququnun aktları, həyata keçirilməsi mümkün olan əlavə tədbirlər, həmçinin internet provayderləri və şəbəkə cəmiyyətləri ilə effektiv əməkdaşlığın aspektləri müzakirə ediləcək.
