Bakı Şəhəri üzrə Təhsil İdarəsi orta məktəblərin bufetlərində meyvə - tərəvəzin satışı ilə bağlı bir neçə gün öncə təşəbbüs irəli sürüb. İdarə rəhbərliyi hesab edir ki, təzə meyvə-tərəvəz şagirdlərin sağlamlığı və intellektin inkişafı baxımından xeyirlidir. İdarənin bu təşəbbüsünü təhsil naziri Misir Mərdanov da müdafiə edib. Bu isə o deməkdir ki, tezliklə məktəblərdə təzə meyvə-tərəvəz satışı reallaşacaq.
Bakı Şəhəri üzrə Təhsil İdarəsi artıq paytaxtdakı bir ümumtəhsil müəssisəsində eksperimentə də başlayıb. Modern.az xəbər verir ki, Bakı Bağça-Məktəb-Lisey Kompleksinin bufetində meyvə - tərəvəzin satışı həyata keçirilib. Müşahidələr göstərib ki, Lisey Kompleksinin şagirdləri daha çox banan və narıngiyə (mandarin) meyl ediblər. Fevralın 11-də Bağça-Məktəb-Lisey Kompleksinin bufetində meyvə - tərəvəzin satışı gün ərzində iki dəfə həyata keçirilib.
Qeyd edək ki, Bakı Şəhəri üzrə Təhsil İdarəsi hazırda ictimaiyyət arasında orta məktəblərdə meyvə-tərəvəz satışına münasibətlə bağlı sorğu keçirir. İdarənin məlumatına görə, sorğuya qatılan respondentlərin yarıdan çoxu təşəbbüsü dəstəkləyir.
Modern.az
