Bakı-Ələt-Astara magistral yolunda təhlükəli vəziyyət yaranıb. Modern.az-ın məlumatına görə, bu barədə Nəqliyyat Nazirliyi katibliyinin rəisi Namiq Həsənov bildirib. Onun sözlərinə görə, Kür çayının daşması və təhlükəli vəziyyət yaratması üzündən Bakı-Ələt-Astara və Hacıqabul-Bəhramtəpə-Mincivan avtomobil yolunun da müəyyən bir hissəsi bağlana bilər.
"Bununla bağlı komissiya işləyir və komissiyanın qərarından sonra yolun hansı kilometrliklərində yolun bağlanması müəyyən olunacaq”,- deyə Nəqliyyat Nazirliyinin rəsmisi bildirib.
Qeyd edək ki, Kür çayının məcrasından çıxması və suyun səviyyəsinin qalxması ilə əlaqədar dəmir yolunun Şirvan-Astara istiqamətində də hələ bir müddət öncə problemlər yaranıb. Mayın 9-dan etibarən Astara istiqamətində qatarların hərəkəti dayandırılıb.
N.Həsənov deyib ki, təbii fəlakətlə bağlı olaraq Bakı-Astara dəmir yolu hələ bir müddət bağlı qalacaq. O, bildirib ki, bu istiqamətdə dəmir yolu xəttinin bərpası xeyli vaxt aparacaq: “Orada onlarla kilometr yataq yarılıb. Digər tərəfdən bu ərazidən suyun çəkilməsi üçün də xeyli vaxt lazım olacaq. İstər-istəməz həmin ərazidə dəmir yolu əsaslı təmir olunmalı və bərkitmə işləri aparılmalıdır".
Modern.az
