2025-ci ildə məişət zorakılığından zərər çəkmiş şəxslərlə bağlı 433 mühafizə orderi icraatda olub. Onlardan 402-si qadınlar, 31-i isə kişilər barədə verilib.
Modern.az-ın məlumatına görə, məsələ Milli Məclisinin Ailə, qadın və uşaq məsələləri komitəsinin bugünkü iclasında müzakirə olunan Azərbaycan Respublikasının Ailə, Qadın və Uşaq Problemləri üzrə Dövlət Komitəsinin 2025-ci il üzrə Məlumatında əksini tapıb.
Bildirilib ki, 2025-ci ildə məişət zorakılığından zərər çəkmiş şəxslərə verilən mühafizə orderlərindən 381-i qısamüddətli, 52-si isə uzunmüddətli olub. 2024-cü ildə isə 325 qısamüddətli, 34 uzunmüddətli order verilib.
Qeyd olunub ki, ümumilikdə 433 mühafizə orderi icraatda olub. Onlardan 402-si qadınlar, 31-i isə kişilər barədə verilib. Müqayisə üçün bildirilib ki, 2024-cü ildə bu göstərici 359 olub və orderlərin 338-i qadınlar, 21-i kişilər barədə verilib.
Hesabatda vurğulanıb ki, 217 mühafizə orderinin icrası təmin olunaraq icraatlarına xitam verilib. 2024-cü ildə bu rəqəm 190 olub.
Məlumata əsasən, 20 mühafizə orderinin icraatına digər əsaslarla xitam verilib. 2024-cü ildə isə 12 orderin icraatına xitam verilib.
Sənəddə qeyd edilib ki, 35 mühafizə orderi “İcra haqqında” Qanunun 7-ci və 9-cu maddələri ilə geri qaytarılıb. 2024-cü ildə bu rəqəm 28 olub.
Həmçinin 4 mühafizə orderi “İcra haqqında” Qanunun 23.1.1-ci maddəsi ilə geri qaytarılıb. 2024-cü ildə belə hal qeydə alınmayıb.
Bundan başqa, 4 mühafizə orderi ərazi aidiyyəti üzrə göndərilib. 2024-cü ildə isə bu göstərici 18 olub.
Qeyd olunub ki, 153 mühafizə orderi növbəti hesabat dövrünə qalıq keçib. 2024-cü ildə bu rəqəm 111 təşkil edib.
