İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti keyfiyyətsiz yeni il hədiyyələrinin satışının qarşısının alınması məqsədilə monitorinqlərini davam etdirir.
Modern.az-ın məlumatına görə, Dövlət Xidməti tərəfindən Sumqayıt şosesi, 13-cü km ünvanında yerləşən "Bolluq LTD" MMC-də aparılan yoxlama zamanı müəssisədə satışa hazır qənnadı məhsullarından komplektləşdirilərək yeni il hədiyyəsi kimi xüsusi hazırlanmış və kağız qutulara qablaşdırılmış malların saxlama müddətinin normativ sənədlərlə müəyyən edilmiş müddətdən artıq göstərildiyi müəyyən edilib. Belə ki, hədiyyə komplektinə daxil edilmiş "Piknik" və "Sport" adlı peçenyelərin saxlama müddəti normativ sənədlərə əsasən 3 ay təşkil etdiyi halda, etiketlərində 6 ay göstərilib. Normativ sənədlərə əsasən, saxlama müddəti 3 ay təşkil edən "Celli" adlı marmeladın və şokoladlı vaflinin üzərində isə istehsal tarixi və saxlama müddəti ümumiyyətlə göstərilməyib. Lakin bu məhsullar da daxil edilməklə komplektləşdirilmiş yeni il hədiyyələrinin üzərində saxlama müddəti 6 ay göstərilib.
Qanun pozuntuları ilə əlaqədar müəssisənin anbarında aşkar edilmiş 9790 ədəd hədiyyə komplektinin satışının dayandırılması və bu məhsulların ticarət şəbəkəsindən yığılması barədə Dövlət Xidməti tərəfindən "Bolluq LTD" MMC-yə icrası məcburi göstəriş verilib. Araşdırmalar davam etdirilir.
İqtisadi İnkişaf Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlakçılara "Bolluq LTD" MMC tərəfindən qablaşdırılmış yeni il hədiyyələrini almamağı tövsiyə edir.
Modern.az
