Azərbaycan Respublikasının Prezidenti İlham Əliyev aprelin 9-da İran İslam Respublikasına rəsmi səfərə gedib.
Azərbaycanın və İranın dövlət bayraqları ilə bəzədilmiş Tehranın “Mehrabad” hava limanında Prezident İlham Əliyevin şərəfinə fəxri qarovul dəstəsi düzülüb.
Azərbaycan Prezidentini İranın yüksək vəzifəli dövlət və hökumət rəsmiləri qarşılayıblar.
İlham Əliyevin Tehranda rəsmi qarşılanma mərasimi olub. Azərbaycanın və İranın dövlət bayraqlarının dalğalandığı Prezident sarayının qarşısındakı meydanda dövlətimizin başçısının şərəfinə fəxri qarovul dəstəsi düzülüb.
İran Prezidenti Həsən Ruhani Azərbaycan Prezidenti İlham Əliyevi qarşılayıb.
Azərbaycanın və İranın dövlət himnləri səslənib.
Fəxri qarovul dəstəsinin rəisi Azərbaycan Prezidentinə raport verib.
Dövlət başçıları fəxri qarovul dəstəsinin önündən keçiblər.
Daha sonra Azərbaycan dövlət başçısı İlham Əliyev İran prezidenti Həsən Ruhani ilə görüşüb. Modern.az xəbər verir ki, bu barədə H. Ruhaninin rəsmi Twitter səhifəsində məlumat verilib.
“Azərbaycanla bizim qardaşlıq əlaqələrinin genişləndirilməsində heç bir məhdudiyyət yoxdur”-deyə H. Ruhani Twitter-dən mesaj verib.
Aqşin Kərimov
