Modern.az

Fənn kurikulumlarında məzmun yükü azaldılır

Fənn kurikulumlarında məzmun yükü azaldılır

Təhsil

Bu gün, 11:48

“Hazırda artıq 10 fənn kurikulumu təkmilləşdirilib və tətbiqinə başlanılıb”.

 Modern.az AzEdu.az-a istinadən  xəbər verir ki, bu sözləri Azərbaycan Respublikasının Təhsil İnstitutunun keçirdiyi “Fənn kuriklumlarının təkmilləşdirilməsinə dair maarifləndirmə tədbirləri” adlı müzakirəsində STEM, texniki və təbiət fənlərinin proqramları şöbəsinin müdiri Mənsur Məhərrəmov jurnalistlərə açıqlamasında bildirib.

“Təkmilləşdirilmiş informatika fənn kurikulumu haqqında sizə həm məlumat vermək, yenilikləri çatdırmaq, həm də bu kurikulumla bağlı rəy və təkliflərinizi dinləmək istəyirik. Fənn kurikulumlarının təkmilləşdirilməsinə Nazirlər Kabinetinin müvafiq qərarı əsasında 2021-ci ildən başlanılıb. Hazırda 10 fənn kurikulumu təkmilləşdirilərək tətbiqə verilib və onlardan biri də informatikadır. Təbiət fənn kurikulumu isə təkmilləşdirilmə deyil, sıfırdan yenidən yazılıb. Digər 10 fənn kurikulumunun təkmilləşdirilməsi prosesi hazırda davam edir. 

Kurikulum sənədinin strukturunda və ümumi yanaşmada nəzərdə tutulan yeniliklər barədə qısa məlumat verim. Sənədin quruluşu sadələşdirilib, başlıq və altbaşlıqlar daha aydın verilib. Məlumatlar uzun-uzun cümlələrlə yüklənmədən, konkret və anlaşılan formada təqdim olunacaq; bu yanaşma bütün fənn kurikulumlarına, o cümlədən informatikaya aiddir. 

Bəzi hissələrdə ixtisarlar edilib və bu, təkcə informatika fənn kurikulumuna deyil, hamısına aiddir. Məsələn, əvvəlki inteqrasiya cədvəli ləğv olunub, çünki o, sənədin həcmini artırmaqdan başqa işə yaramırdı. İnteqrasiya müəllimin ümumi savadından və o anki çevikliyindən asılı məsələ kimi qiymətləndirilir. İnteqrasiya məqamında təmin olunmalıdır və müəllim bunu çevik şəkildə həyata keçirməlidir, əvvəlcədən hazırlaşa bilməsi isə daha yaxşı olar. 2013-cü il kurikulumlarından fərqli olaraq, bu dəfə qiymətləndirməyə dair bölmə əlavə edilib. 

Bütün fənn kurikulumlarının təkmilləşdirilməsində əsas prinsip sənədin müəllimlər üçün faydalı və istifadəçiyönümlü olmasıdır. Məqsəd onu sadəcə rəsmi sənəd kimi deyil, dərs zamanı işə yarayan praktik vəsait kimi təqdim etməkdir. Sertifikasiya başlamazdan əvvəl müəllimlər arasında keçirdiyimiz sorğularda informatika fənn kurikulumuna sonuncu dəfə nə vaxt baxdıqlarını soruşurduq və nəticə 10 faizə belə çatmırdı, son bir-iki ayda baxanların sayı isə daha az idi. Bunun əsas səbəbi müəllimlərin ona ehtiyac duymaması, öz biliklərini və ya dərsliyi kifayət hesab etməsi idi. İndi isə müəllimlərin sənədin faydasına inanaraq ehtiyac yarandıqda ona müraciət etməsini hədəfləyirik. Bunun üçün sənədin həcmini optimallaşdırdıq; informatika 1-ci sinifdən 11-ci sinifə qədər tədris olunduğu üçün həcm hələ də böyükdür və əsas hissə məzmunun təqdimatına, yəni alt standartlara, onların izahlarına və sinifdaxili fəaliyyətlərə ayrılıb. 

Detallara varmadan ümumi yanaşmanı deyim: digər fənlərin - riyaziyyat, coğrafiya, təbiət elmləri, fizika, kimya, biologiya və həyat bilgisinin hazırlanmasında xarici mütəxəssislər də cəlb olunub, lakin informatika kurikulumu tamamilə yerli mütəxəssislərin iştirakı ilə hazırlanıb. Məzmunla bağlı yeniliklərə gəlincə, bu məsələyə yalnız informatika baxımından yanaşmırıq. Bütün fənlər üzrə aparılan təhlillər, eləcə də müəllim və valideyn kimi müşahidələrimiz göstərdi ki, fənlərin məzmununda yüklənmələr var. Buna görə də riyaziyyat, fizika, kimya da daxil olmaqla bütün fənlərin məzmununda nisbi yüngülləşdirmə və optimallaşdırma aparılıb”.

Instagram
Gündəmdən xəbəriniz olsun!
Keçid et
Canlıda gərgin müzakirə! Fazil Mustafa kritik sualları cavablayır...