İran prezidenti İbrahim Rəisinin helikopterinin qəzaya uğraması nəticəsində həlak olanların hamısının cəsəd qalıqlarının şəxsiyyəti dəqiqləşdirilib.

Modern.az xəbər verir ki, bu barədə “Tasnim” agentliyi məlumat yayıb.

Böhran İdarəetmə Mərkəzi bildirib ki, DNT testinə ehtiyac yoxdur.

Qeyd olunur ki, hadisə yeri aşkarlanarkən Təbriz şəhərinin cümə imamı Məhəmməd Ali əl-Haşimin cəsədi digərlərininki ilə müqayisədə daha yaxşı vəziyyətdəymiş – az yanıbmış. Onun qəzadan sonra təxminən bir saat sağ qaldığı və hətta İran Prezident Administrasiyasının rəhbəri ilə telefon əlaqəsi saxladığı da bildirilir.

Prezident, xarici işlər naziri və digərlərinin cəsədləri daha çox yansa, da onların tanınmasında ciddi problem yaşanmayıb.

Mayın 19-da İranın Şərqi Azərbaycan əyalətində prezidenti daşıyan helikopter qəzaya uğrayıb. Qəza nəticəsinə dövlət başçısı İbrahim Rəisi ilə yanaşı, helikopterdə olan xarici işlər naziri Hüseyn Əmir Abdullahian, Şərqi Azərbaycan əyalətinin qubernatoru Malik Rahmati, Təbriz şəhərinin cümə imamı Məhəmməd Ali əl-Haşim, İslam İnqilabı Keşikçiləri Korpusunun (SEPAH) generalı, Prezident qvardiyasının rəhbəri Mehdi Musəvi və daha bir neçə nəfər həlak olub.

8 nəfərin öldüyü hadisə ilə əlaqədar ölkədə 5 günlük matəm elan edilib.

Helikopter qəzasında həlak olan İran Prezidenti İbrahim Rəisinin cənazəsinin Məşhəd şəhərində dəfn olunacağı gözlənilir.