Եվրոպական միության արտաքին քաղաքականության և անվտանգության հարցերով բարձր ներկայացուցիչ Կայա Կալլասը պաշտպանել է Ուկրաինայի կողմից Ռուսաստանի նավթավերամշակման գործարաններին հասցված հարվածները։
Modern.az-ը հայտնում է, որ Կալլասն այս մասին հայտարարել է Բրյուսելում։
Նրա խոսքով, Ուկրաինան, թիրախավորելով Ռուսաստանի նավթավերամշակման ձեռնարկությունները, փորձում է հասնել պատերազմի ավելի արագ ավարտի։
Կալլասը նշել է, որ նավթի վաճառքից ստացված եկամուտները հիմնական դեր են խաղում Ուկրաինայի դեմ Ռուսաստանի պատերազմի ֆինանսավորման գործում։
«Ռուսաստանի կողմից պատերազմի վրա ծախսված միջոցների մեծ մասը ստացվում է նավթային եկամուտներից։ Ուկրաինան ցանկանում է, որ այս պատերազմն ավարտվի։ Հետևաբար, կարևոր է սահմանափակել պատերազմի ֆինանսական աղբյուրները», - ընդգծել է նա։
Եվրոպական դիվանագիտության ղեկավարը նշել է, որ կարևոր է միջազգային ճնշումներն ուղղել ոչ թե Կիևի, այլ Մոսկվայի վրա։
«Այս պատերազմն ավարտելու համար անհրաժեշտ է ճնշում գործադրել Ռուսաստանի վրա, այլ ոչ թե ստիպել Ուկրաինային հանձնվել», - հավելել է Կալլասը։
Նա հայտարարել է, որ Եվրոպական միությունը պահպանում է իր դիրքորոշումն այս հարցում և կշարունակի աջակցել Ուկրաինային։
