Իրանական կողմը Հայաստանից հարցրել է՝ արդյոք ամերիկացի զինվորականներ կտեղակայվե՞ն «Թրամփի երթուղու» (TRIPP) վրա, և ստացել է «ոչ» պատասխանը։
Modern.az-ը հայտնում է, որ այս մասին հայտարարել է Հայաստանի արտգործնախարար Արարատ Միրզոյանը՝ մեկնաբանելով Իրանի վերաբերմունքը TRIPP նախագծի նկատմամբ։
«Նրանց համար միանգամայն նորմալ է նման հարց տալը։ Մենք պատասխանեցինք։ Թեհրանը նույնպես հայտարարում է, որ եթե նման բան չկա, դա շատ լավ է։ Ի վերջո, նրանք նույնպես կկարողանան օգտվել երկաթուղուց»,- ասել է Միրզոյանը։
Անդրադառնալով Իրանի պաշտոնյաների հայտարարություններին, թե երրորդ երկրների ներկայությունը տարածաշրջանում կարող է խաթարել կայունությունը, Միրզոյանը սկզբունքորեն համաձայնել է այդ տեսակետին։
«Համընդհանուր ճշմարտություն է, որ երրորդ կողմի ռազմական ներկայությունը դժվարացնում է մյուս երկու կողմերի աշխատանքը»,- նշել է նա։
Հիշեցնենք, որ սեպտեմբերին Հայաստանում Իրանի դեսպան Խալիլ Շիրղոլամին հայտարարել էր, որ Թեհրանը Երևանին առաջարկել է ստեղծել մտքերի փոխանակման մեխանիզմ՝ TRIPP նախագծի հետ կապված մտահոգությունները վերացնելու համար։
Դիվանագետը նշել էր, որ ԱՄՆ նախագահ Դոնալդ Թրամփի հակաիրանական քաղաքականության ֆոնին Թեհրանը Հայաստանին է փոխանցել նախագծի հետ կապված իր մտահոգությունները։ Այնուամենայնիվ, նրա խոսքով, առկա հարցերը կարող են լուծվել Երևանի և Թեհրանի միջև բարեկամության և բարիդրացիության պայմաններում։
