Լեհաստանում Սահմանադրական տրիբունալի ղեկավարության գործունեության դադարեցումը քաղաքական առճակատման պատճառ է դարձել։ Նախագահ Կարոլ Նավրոցկին ընդհատել է Սենեգալ կատարած այցը և վերադարձել Վարշավա։
Modern.az-ը, հղում անելով BBC-ին, հայտնում է, որ արդարադատության նախարար Վալդեմար Յուրեկը պահանջել է հանել տրիբունալի նախագահ Բոգդան Շվենչկովսկու և նրա տեղակալ Բարտլոմեյ Սոխանսկու անձեռնմխելիությունը՝ նրանց քրեական պատասխանատվության ենթարկելու համար։ Նրանք մեղադրվում են խորհրդարանի կողմից ընտրված նոր դատավորների գործունեությանը խոչընդոտելու մեջ։
Որոշումից հետո ընդդիմադիր «Իրավունք և արդարություն» կուսակցության ներկայացուցիչներն ու կողմնակիցները հավաքվել են դատարանի շենքի դիմաց։ Ցուցարարների մուտքը շենք կանխելու համար տարածք են տեղակայվել հատուկ նշանակության ոստիկանական ուժեր։
Վարշավա վերադարձած Նավրոցկին Նախագահական պալատում գիշերային խորհրդակցություն է անցկացրել տրիբունալի գործունեությունը դադարեցված նախագահ Բոգդան Շվենչկովսկու և Գերագույն դատարանի առաջին նախագահ Զբիգնև Կապինսկու հետ։ Այնուհետև նախագահը Կապինսկու հետ միասին մեկնել է Սահմանադրական տրիբունալի շենք։
Նավրոցկին հոկտեմբերի 31-ին նաև շտապ խորհրդակցություններ է հրավիրել խորհրդարանում ներկայացված քաղաքական ուժերի ներկայացուցիչների մասնակցությամբ։ Նախագահը հայտարարել է, որ դրա նպատակն է կայունացնել քաղաքական իրավիճակը և վերականգնել սահմանադրական կարգը։
Պետության ղեկավարը կառավարության քայլերը գնահատել է որպես սահմանադրական կարգի խախտում և պահանջել է, որ ոստիկանական ուժերը լքեն տրիբունալի տարածքը։
Վարչապետ Դոնալդ Տուսկը հայտարարել է, որ կառավարությունը գործում է օրենքի գերակայությունը վերականգնելու համար։
Նշենք, որ Լեհաստանում Սահմանադրական տրիբունալի կազմը և դատավորների նշանակումը երկար ժամանակ վիճաբանության առարկա են կառավարության և ընդդիմության միջև։ Իշխանությունը դա գնահատում է որպես հեղաշրջման փորձ։
