Azərbaycanın sabiq Baş naziri Rəhim Hüseynov vəfat edib. 87 yaşında dünyasını dəyişən R.Hüseynov 1992-ci ilin mayından 1993-cü ilin yanvar ayına kimi Azərbaycanın Baş naziri vəzifəsində çalışıb.
Modern.az saytı Azərbaycanın müstəqillik əldə etdikdən – 1991-ci ildən indiyə kimi Baş nazir olmuş şəxslərin siyahısını təqdim edir.
Müstəqil Azərbaycanın ilk Baş naziri Həsən Həsənov olub. 1991-ci il fevralın 7-də bu vəzifəyə təyin edilən baş nazirin səlahiyyət müddəti cəmi 421 gün çəkib. O, 4 aprel 1992-ci ildə vəzifəsindən azad edilib.
Daha sonra müvəqqəti Baş nazir təyin olunan Feyruz Mustafayevin qısa səlahiyyət dövrü olub. O, Baş nazir postunda cəmi 40 gün çalışıb. F.Mustafayev 2018-ci ildə vəfat edib.
Yenicə müstəqillik əldə etmiş dövlətin siyasi həyatında kifayət qədər qarışıqlıq hökm sürdüyündən 90-cı illərdə vəzifə dəyişiklikləri az qala adi hala çevrilmişdi. Ona görə, Azərbaycanın üçüncü Baş naziri Rəhim Hüseynov da bu vəzifədə çox qala bilmədi. 1992-ci il mayın 14-də bu vəzifəyə təyin olunan Rəhim Hüseynovun səlahiyyət müddəti 261 gün çəkdi və o, 30 yanvar 1993-cü ildə bu postdan uzaqlaşdırıldı. R.Hüseynov 2023-cü il noyabrın 13-də vəfat edib.
Həmin dönəmdə müvəqqəti Baş nazir təyin olundu. 1993-cü il fevralın 5-də bu vəzifənin icrası Əli Məsimova tapşırıldı. Cəmi 82 günlük Baş nazir olsa da, Ə.Məsimov "Azərbaycanın iqtisadi tərəqqi proqramı"nın və "Nazirlər Kabinetinin fəaliyyətinin əsas istiqamətləri"nin müəllifi kimi yadda qalıb. O həmçinin, "Azərbaycanın iqtisadi müstəqillik konsepsiyası", "Aqrar islahatlar proqramı" və s. bu kimi proqram və digər sənədlərin, eləcə də 30-dan artıq qanun layihəsinin hazırlanmasında bilavasitə iştirak edib. Ə.Məsimli 1993-cü il aprelin 28-də vəzifəsindən azad olunub. Əli Məsimov hazırda Milli Məclisin deputatıdır.
Əli Məsimlinin müvəqqəti Baş nazirliyindən sonra bu posta Pənah Hüseyn gətirilib. O, 1993-cü il aprelin 18-dən iyunun 30-na qədər bu vəzifədə qalıb.
Daha sonra növbə hökümətə qarşı qiyam qaldırmaqla xatırlanan Sürət Hüseynova çatıb. “Qiyamçı polkovnik” 30 iyun 1993-cü ildən 7 oktyabr 1994-cü ilə kimi Baş nazir vəzifəsində çalışıb. Surət Hüseynov bu il iyulun 31-də İstanbulda müalicə olunduğu xəstəxanada vəfat edib.
Sürət Hüseynovdan sonra növbəti Baş nazir Fuad Quliyev olub. O, digərlərinə nisbətən bu vəzifədə daha uzun müddət qalıb: 7 oktyabr 1994-cü ildən 20 iyul 1996-cı ilə kimi.
F.Quliyevin hazırda Ukraynada yaşadığına dair məlumatlar var.
1996-cı il iyulun 20-də Baş nazir postuna təyinat alan Artur Rasizadə 2003-cü il avqustun 4-nə kimi bu vəzifədə qalıb.
Daha sonra isə onu Azərbaycanın hazırkı prezidenti İlham Əliyev əvəz edib. İlham Əliyev 4 avqust 2003cü ildən 4 noyabr 2003-cü ilə kimi Baş nazir olub. O, prezident seçildiyinə görə, Baş nazir postundan ayrılıb.
2003-c il noyabrın 4-də Artur Rasizadə yenidən Baş nazir vəzifəsinə qaytarılıb. O, 2018-ci il aprelin 21-nə qədər bu vəzifədə qalmaqla, ən uzun müddətli Baş nazir kimi adını Azərbaycan tarixinə yazdırıb. O, hazırda təqaüddədir.
Azərbaycanın növbəti Baş naziri Novruz Məmmədov olub. O 2018-ci il aprelin 21-də bu vəzifəyə təyin olunub. Novruz Məmmədovun səlahiyyət müddəti 535 gün çəkib. O, 8 oktyabr 2019-cu ildə istefa verib. N.Məmmədov hazırda Azərbaycan Dillər Universitetində prorektor işləyib.
8 oktyabr 2019-cu ildə Baş nazir vəzifəsinə Prezidentin iqtisadi məsələlər üzrə köməkçisi Əli Əsədov təyin olunub. O, hazırda da bu vəzifədə çalışmaqda davam edir.
A.Qorxmaz
