Azərbaycanda “SSP Production” tərəfindən istehsal olunmuş və dünyada böyük maraq doğurmuş “Nobel qardaşlarının ilk uğuru” sənədli filmi beynəlxalq festivalda digər ölkələrin filmləri ilə mübarizə aparır.
Modern.az xəbər verir ki, sənədli film ABŞ-da keçirilən “Accolade Qlobal Film Yarışması”nda bütün mərhələləri keçərək “Ən yaxşı sənədli filmi” kateqoriyası üzrə mükafata layiq görülüb.
“Accolade Global Film Yarışması” yüksək keyfiyyətli filmləri və yeni media işi istehsal edən rejissorların uğurlarını təqdir edir. Bu isə rejissorların etibarlılıq və populyarlıq qazanmalarına kömək etmək niyyəti daşıyır. Qaliblər 44000+ e-poçt sənayesi mütəxəssislərinin, habelə əlavə beynəlxalq media qurumlarının məlumat bazasında elan olunur.
2003-cü ildə qurulan “Accolade Global Film Yarışması” 16-cı ildir ki, sənayedə yüksək səviyyəli, nüfuzlu qlobal film yarışması kimi tanınıb. “Accolade Qlobal Film Yarışması” istedadlı rejissorlara, prodüserlərə, aktyorlara və yaradıcı kollektivlərə layiq olduqları qiyməti verir.
“SSP Production”un rəhbəri C.Qasımovun sözlərinə görə, “Accolade Qlobal Film Yarışması” film, yeni və eksperimental media, televiziya proqramları, animasiya, təhsil proqramları, remiks və mashuplar, film qoşquları, musiqi videoları, veb-diodların tanıdılması üçün əla məkandır.
Onun sözlərinə görə, hər il “Accolade Qlobal Film Yarışması”na minlərlə film giriş alır. Müsabiqədə keyfiyyət və yaradıcılıq dörd səviyyədə mükafatla qeyd olunur.
Cəlaləddin Qasımov film barədə də məlumat verib:
“Nobel qardaşlarının Azərbaycanda geniş fəaliyyəti olub. Onlar gəlirlərinin əsas hissəsini Bakı neftindən əldə etmişdi. Nobel qardaşlarından Robert Nobel Azərbaycana qoz ağacı axtarmağa gəlir. Lakin Bakı neftini görür və “Nobel qardaşları” firmasını yaradır. “Nobel qardaşları” firması ilə rəqabət aparan iri neft sənayesi sahiblərindən biri Hacı Zeynalabdin Tağıyev idi. Nobellərin ən inandığı, hörmət etdiyi şəxsiyyət də elə Tağıyev olub. 1875-ci ildə “Nobel qardaşları” firmasının əsası qoyulur. Robert Nobel ilk olaraq Bakının “Qara şəhər” adlanan sahəsində 25 min rubla kiçik bir zavod alır. 1918-ci ildə onun sərvətinin miqdarı 45 milyona çatmışdı. Hesablamalara görə, həmin vəsait bu günkü məzənnə ilə 32 milyard ABŞ dolları edir.
Dünyaca məşhur olan Nobel qardaşlarının gəlirlərinin əsas hissəsini Bakı neftindən əldə etməsini çox az adam bilir”.
“Nobel qardaşlarının ilk uğuru” sənədli filmi 40 ölkədə 100-dən artıq beynəlxalq festivala göndəriləcək.
“Nobel qardaşlarının ilk uğuru” filminin çəkilişləri 17 mart 2019-cu ildə başa çatıb. Sənədli filmin redaktoru Əkbər Qoşalı, qrafika ustası Xaqani Mammadovdur. Mətni Eldost Bayram oxuyub. .
“ Accolade Global Film Competition” festivalında mukafat alan filmlərin siyahısı ilə bu linkdən tanış ola bilərsiniz.
