"WhatsApp" istifadəçilər üçün bir neçə yeni funksiyanı istifadəyə verib.
Modern.az xəbər verir ki, yeniliklər arasında ən diqqətçəkəni qrup söhbətlərində @all qeydindən istifadə edərək bütün üzvlərə eyni anda bildiriş göndərmək imkanıdır. Bu funksiya Discord, Slack və Microsoft Teams platformalarındakı "everyone" və ya "here" bildirişlərinə bənzəyir. Belə ki, istifadəçi @all yazaraq qrupdakı hər kəsin diqqətini vacib və ya təcili mesaja yönəldə biləcək.
Bununla belə, funksiyadan sui-istifadənin qarşısını almaq üçün müəyyən məhdudiyyətlər tətbiq olunub. 32 nəfərdən çox üzvü olan qruplarda @all funksiyasından yalnız administratorlar istifadə edə biləcək. Bundan əlavə, qrup bildirişlərini səssizə alan istifadəçilər belə bu bildirişləri alacaqlar. Lakin istənilən istifadəçi bildiriş ayarlarından @all xəbərdarlıqlarını söndürə biləcək. "WhatsApp" həmçinin sorğular (Polls) funksiyasını da yeniləyib. Artıq sorğular üçün səsvermənin bitmə vaxtını əvvəlcədən təyin etmək, anonim səsverməni aktivləşdirmək və sorğunu yaratdıqdan sonra 15 dəqiqə ərzində sualları redaktə etmək mümkün olacaq.
Digər yenilik isə yeni qrup yaratma prosesini sürətləndirir. İstifadəçilər mövcud qrupdakı üzvləri bir-bir əlavə etmək əvəzinə, bir toxunuşla həmin qrup əsasında yeni söhbət yarada biləcəklər.
