Modern.az

Bakıda müəllimlərin işə qəbulu üçün II müsabiqə elan olundu

Bakıda müəllimlərin işə qəbulu üçün II müsabiqə elan olundu

1 Oktyabr 2009, 11:46

Təhsil Nazirliyi oktyabrın 1-də Bakı şəhərinin ümumtəhsil məktəblərindəki vakant yerlərə II müsabiqə elan edib.

Modern.az nazirliyin ictimaiyyətlə əlaqələr şöbəsinə istinadən xəbər verir ki, müsabiqəyə paytaxtın müxtəlif məktəblərində olan 226 vakant iş yeri çıxarılıb. Onlardan 27-si ibtidai sinif, 8-i Azərbaycan dili və ədəbiyyat, 10-u riyaziyyat, 40-ı informatika, 10-u fizika, 7-si kimya, 8-i biologiya, 10-u tarix, 10-u coğrafiya, 22-si ingilis dili, 40-ı fiziki tərbiyə, 12-si gənclərin çağırışa qədərki hazırlığı, 6-sı əmək hazırlığı, 11-i musiqi və nəğmə, 5-i təsviri incəsənət, rəsmxət müəllimi yerləridir.

Vakant yerlərə namizədlərdən elektron ərizələr 6 oktyabr 2009-cu il tarixədək qəbul ediləcək. Ərizə doldurularkən yalnız bir ixtisas seçilə bilər və ən çoxu 2 məktəbdə həmin ixtisas üzrə vakant yer göstərilə bilər.

Oktyabrın 7-dən 12-dək elektron ərizənin çap olunmuş variantı və digər müvafiq sənədlər (kadrların şəxsi uçot vərəqi, diplom, diploma əlavə, əmək kitabçası, şəxsiyyət vəsiqəsinin və ərizə formasındakı göstəriciləri təsdiq edən digər sənədlərin surətləri) namizədlər tərəfindən Təhsil Nazirliyinin Strateji təhlil, planlaşdırma və kadrların idarə olunması şöbəsinə təqdim edilməlidir. Müəyyənləşdirilmiş müddət bitdikdən sonra sənədlərin qəbulu dayandırılacaq.

Müəllimlərin işə qəbulu üzrə müsabiqə iki mərhələdə keçiriləcək. I mərhələdə vakant yerlərə ərizə vermiş namizədlərin göstəriciləri təqdim olunmuş sənədlərə əsasən oktyabrın 13-dək qiymətləndiriləcək.

Müsabiqənin II mərhələsində namizədlərlə müəyyən olunmuş vaxtda müsahibə və ya test imtahanı keçiriləcək və nəticələr qiymətləndiriləcək.

Hər iki mərhələnin nəticələri nəzərə alınmaqla namizədlərin yekun qitmətləndirilməsi həyata keçiriləcək. Sonra keçid balı toplamış namizədlərin ərizədə göstərdikləri konkret məktəbdə iş yerinə qəbulu barədə müvafiq qərar qəbul ediləcək və nəticələr iki saat ərzində namizədlərə elan olunacaq.

Test tapşırıqlarının 80 və daha yüksək faizinə düzgün cavab vermiş namizədlər keçid balını toplamış hesab olunacaqlar.

Bir yerə bir neçə namizəd sənəd verdiyi halda, daha yüksək nəticə göstərmiş namizəd həmin vakant yerə təyin olunacaq.    Təhsil Nazirliyinin məktubuna əsasən, məktəb direktoruun əmri ilə işə götürülən müəllimlərlə əmək müqaviləsi bağlanılacaq. Müsabiqənin nəticələri ilə bağlı  apelyasiya şikayətinə müsabiqə keçirildiyi vaxtdan sonra bir həftə ərzində baxılacaq.

Təhsil Nazirliyindən bildirilib ki,  namizədlərin sənədlərinin qəbulu zamanı onların Bakı şəhərində qeydiyyatda olması nəzərə alınacaq.  Bütün müsabiqələr Azərbaycan Müəllimlər İnstitutunun binasında keçiriləcəkdir.

Xatırladaq ki, sentyabrda keçirilən I müsabiqəyə Bakıdakı məktəblərdə olan 365 vakant yer çıxarılmışdı. Həmin yerlərə 2147 müəllim elektron ərizə vermişdi. Yekunda yerlərin 226-sə tutulmamışdı.

 

“Modern.az”

 

Facebook
Dəqiq xəbəri bizdən alın!
Keçid et
Ukraynadan Rusiyaya ardıcıl zərbələr: Vəziyyət kritikdir