Özbəkistan prezidenti Şavkat Mirziyoyev Fələstin-İsrail qarşıdurmasına münasibət bildirib.
Modern.az "Kun.uz"a istinadən xəbər verir ki, Mirziyoyev keçirdiyi müşavirədə bu mövzuya toxunub.
“Məlumdur ki, İsrail ordusu ilə HƏMAS arasında davam edən silahlı qarşıdurma humanitar böhranı daha da gücləndirir, günahsız mülki insanlar arasında çoxlu sayda itki verir. Uşaqlar və qadınlar ölür, insanlar evlərini itirir və evlərini tərk etmək məcburiyyətində qalırlar. Bütün fələstinli və israilli qurbanların ailələrinə səmimi başsağlığı bildiririk. Qəzza zolağının sakinlərinə hər cür humanitar yardım göstərmək üçün Birləşmiş Millətlər Təşkilatının Yaxın Şərq Agentliyinə 1 500 000 dollar ayırmaq qərarına gəldik.
Biz Fələstin xalqı ilə həmrəy olduğumuzu qətiyyətlə bildiririk və onun Birləşmiş Millətlər Təşkilatının Baş Assambleyası və Təhlükəsizlik Şurasının əvvəllər qəbul edilmiş qətnamələrinə uyğun olaraq müstəqil dövlət qurmaq hüququnu dəstəkləyirik”, - deyə Özbəkistan prezidenti bildirib.
Zorakılığın artmasının beynəlxalq vəziyyətin genişmiqyaslı destabilizasiyasına və silahlı münaqişələrə yeni qüvvələrin cəlb olunmasına gətirib çıxaracağı qeyd edilib.
“Bütün bunlar təkcə Yaxın Şərq regionu ilə deyil, həm də uzaq ölkələri əhatə edən gözlənilməz faciələrə səbəb ola bilər. Məhz bu səbəbdən biz hər iki tərəfi humanitar əsaslarla dərhal güzəştə getməyə, hərbi əməliyyatları dayandırmağa və münaqişəni sülh yolu ilə həll etməyə çağırırıq. Məlumdur ki, yaşadığımız Mərkəzi Asiya regionu müxtəlif millətlərin və dinlərin nümayəndələrinin dinc yanaşı yaşamasının unikal təcrübəsinə malikdir. Əsrlər boyu bu torpaqda müsəlmanlar, xristianlar və yəhudilər yan-yana dostluq və harmoniya şəraitində yaşayıblar.
Mən bu gün fürsətdən istifadə edərək bütün soydaşlarımıza, ilk növbədə, gənclərimizə müraciət edir, onları müxtəlif yalançı təbliğatlara uymamağa, qanunsuz əməllərə yol verməməyə çağırıram. Biz hamımız ən böyük gücümüzü, əvəzsiz sərvətimizi, sakit və dinc həyatımızı, qarşılıqlı birliyimizi, həmrəyliyimizi qorumalıyıq”, - deyə Mirziyoyev vurğulayıb.
