İran prezidenti Məsud Pezeşkian Sənaye, Mədən və Ticarət Nazirliyində keçirilən toplantıda iştirak edib.
Modern.az “Mehr”ə istinadən xəbər verir ki, Prezident toplantıda ölkədəki vəziyyətlə bağlı fikirləri, narahatlıqları və hesabatları dinləyərək, bazarda sabitliyin qorunması və xalqın yaşayışının müdafiəsi üçün hökumətlə özəl sektor arasında koordinasiyanın gücləndirilməsinin vacibliyini vurğulayıb. O, bazarın tənzimlənməsi, istehsalın dəstəklənməsi və iqtisadi pozucularla mübarizə barədə mühüm tapşırıqlar verib.
Pezeşkian çıxışının digər hissəsində Ali Rəhbər Ayətullah Seyid Müctəba Xamenei ilə son görüşünə toxunub. O, görüşün təxminən iki saat yarım davam etdiyini deyib. Prezidentin sözlərinə görə, ən çox diqqət çəkən məqam Ali Rəhbərin insanlarla davranış tərzi, təvazökarlığı və səmimiyyəti olub. Pezeşkian bildirib ki, bu yanaşma görüş mühitini etimad, sakitlik və birbaşa dialoq atmosferinə çevirib.
O qeyd edib ki, ölkənin ən yüksək rəhbərliyində belə bir davranış modeli idarəetmə sistemi üçün də nümunə ola bilər - xalqa yaxın olmaq, onların problemlərini həqiqətən dinləmək və məsuliyyət hissi ilə davranmaq baxımından.
Prezident hazırkı həssas regional və daxili şəraitdə bu cür yanaşmanın sosial etimadın və milli birliyin güclənməsində mühüm rol oynaya biləcəyini bildirib.
Pezeşkian daha sonra hökumətin fəaliyyətə başladığı gündən ölkənin iqtisadi böhranlar, müharibə, “snapback” mexanizmini yenidən aktivləşdirmək cəhdləri və sosial qarışıqlıqlarla üzləşdiyini deyib. Onun sözlərinə görə, bütün bu təzyiqlərin məqsədi xalq narazılığı yaratmaq, daxili sabitliyi pozmaq və ölkəni zəiflətmək olub. Lakin İran xalqı təhlükəsizlik qüvvələri ilə birlikdə bu planların həyata keçməsinə imkan verməyib.
Prezident enerji istehlakının idarə olunmasını ölkənin böhranlardan çıxmasının əsas şərtlərindən biri adlandırıb. O qeyd edib ki, İranda elektrik enerjisi istehlakı Avropa ölkələrinin orta göstəricisindən təxminən üç dəfə çoxdur və istehlak modelinin dəyişdirilməsi milli zərurətdir.
Pezeşkian deyib ki, hökumətin əsas prioriteti istehsal müəssisələrində qaz və elektrik kəsintilərinin qarşısını almaqdır və bunun üçün evlərdə və inzibati sektorda lazımsız istehlak azaldılmalıdır.
Prezident daha sonra ölkədə qərarvermə proseslərində qətiyyət çatışmazlığı və səlahiyyətlərin toqquşmasının idarəetməni ləngitdiyini bildirib. Bu səbəbdən hökumətin bəzi səlahiyyətləri vilayət rəhbərlərinə və yerli idarələrə verməyə başladığını deyib.
O vurğulayıb ki, daxili fikir ayrılıqları düşmənlərin əsas hədəfidir və bu səbəbdən milli həmrəyliyin qorunması bütün fərqli baxışlardan daha vacibdir.
