Aprelin 8-də Milli Məclisin İqtisadi siyasət, sənaye və sahibkarlıq komitəsinin iclasında Azərbaycan Respublikası Hesablama Palatasının 2020-ci ildə fəaliyyəti haqqında hesabat dinləniləcək.
Modern.az xəbər verir ki, “Hesablama Palatası haqqında qanunun 7-ci maddəsinə əsasən HP Milli Məclisə illik fəaliyyəti barədə hesabat verir. Hesabat məruzəsi ilk öncə MM-in İqtisadi siyasət, sənaye və sahibkarlıq komitəsinin iclasında geniş müzakirə olunacaq. Həm komitə, həm də Milli Məclisin plenar iclasında hesabat məruzəsini Hesablama Palatasının sədri Vüqar Gülməmmədov təqdim edəcək.
Qeyd edək ki, əvvəlki illərdən fərqli olaraq müzakirənin keçiriləcəyi bu ilki İqtisadi siyasət, sənaye və sahibkarlıq komitəsinin iclasına ilk dəfə olaraq Milli Məclisin digər müvafiq komitələrinin sədrləri dəvət olunublar (Hüquq siyasəti və dövlət quruculuğu, Müdafiə, təhlükəsizlik və korrupsiya ilə mübarizə, Təbii ehtiyatlar, energetika və ekologiya, Aqrar siyasət və Əmək və sosial siyasət). Müzakirəyə, həmçinin vətəndaş cəmiyyətinin nümayəndələri də dəvət edilərək hesabatın müzakirəsinin geniş ictimailiyi təmin olunacaq.
