Yeni Azərbaycan Partiyası (YAP) vaxtilə hakim partiyanın Siyasi Şurasının üzvü olmuş sabiq iqtisadi inkişaf naziri Fərhad Əliyevin prezident İlham Əliyevə ünvanladığı əfv müraciətinə münasibət açıqlayıb. YAP-ın icra katibinin müavini, deputat Siyavuş Novruzov eks-nazirin müraciəti ilə bağlı Modern.az –a açıqlama verib.
S.Novruzov Fərhad Əliyevin bu addımını normal qiymətləndirib:
“Mən bunu normal qiymətləndirirəm. Əfv etmək prezidentin səlahiyyətində olan məsələdir. O da belə bir müraciət edib. Bu müraciətə Əfv Komissiyasında baxılacaq. Məqsədə müvafiq bilinəcəksə, əfv oluna bilər. Bütün hallarda bu prezidentin səlahiyyətində olan məsələdir”-deyə YAP rəsmisi vurğulayıb.
Qeyd edək ki, həbsdə olan Fərhad Əliyev əfv olunması üçün prezident İlham Əliyevə müraciət edib.
Xatırladaq ki, Fərhad Əliyev dövlət çevrilişinə cəhd ittihamıyla 2005-ci ilin oktyabrında həbs edilib. Amma 2007-ci il martın 5-də bu ittiham başqa icraatda birləşdirilərək, cinayət işindən ayrılıb və ona dövlət əmlakını mənimsəmə ittihamı irəli sürülüb. 2005-ci il oktyabrın 19-da parlament seçkiləri ərəfəsində öz xidməti kabinetində həbs edilən F.Əliyev məhkəmənin qərarı ilə 10 il müddətinə azadlıqdan məhrum edilib.
Anar RÜSTƏMOV
