İmam Hüseyn Əleyhissalam və yaxınlarının qətlə yetirilməsilə əlaqədar İslam aləmində keçirilən təziyyə mərasimləri yanvarın 4-də başa çatıb. Məhəmməd peyğəmbərin nəvəsi, şiə imamı Hüseyn və onun tərəfdarlarının qətlə yetirilməsi (Kərbəla hadisəsi) Məhərrəm ayında baş verdiyindən müsəlman ölkələrində onu matəm ayı kimi qeyd edirlər.
Modern.az-ın məlumatına görə, yanvarın 4-də İslam aləmində keçirilən matəm mərasimləri yekunlaşıb.
Qeyd edək ki, məhərrəmlik 2013-ci il noyabrın 5-də başlamışdı.
Bununla əlaqədar Bakıdakı restoran və şadlıq evləri də Məhərrəm ayı müddətində sifarişlərin qəbulunu müvəqqəti dayandırmışdılar.
Artıq yanvarın 5-dən restoranlarda toyu-düyün mərasimlərinə də start verilib.
Yeri gəlmişkən, Məhərrəmliyin ardından keçirilən ilk toy qanlı hadisə ilə yadda qalıb. APA-nın məlumatına görə, hadisə Göyçay rayonunun Bəydövül kəndində qeydə alınıb, toyda 4 nəfər bıçaqlanıb.
Kənddə təşkil edilən toy mərasimində iştirak edən qonaqlar arasında baş verən kütləvi dava zamanı 1988-ci il təvəllüdlü Mustafayev Nüsrət Əfqan oğlu, 1989-cu il təvəllüdlü Yusifov Rusif Ramiz oğlu, 1993-cü il təvəllüdlü Yusifli Rüstəmxan Alxan oğlu və 1965-ci il təvəllüdlü Qorxmaz Sərxan oğlu Yusifov bıçaqlanıb, 1987-ci il təvəllüdlü Mustafayev Nəzarət Əfqan oğlu dəmir küt alətlə döyülüb.
Xəsarət alan 5 nəfər Göyçay Mərkəzi rayon Xəstəxanasının cərrahiyyə və travmatologiya şöbələrinə yerləşdirilib.
Faktla bağlı Göyçay rayon Polis Şöbəsi tərəfindən araşdırma aparılır.
Modern.az
