“Xəzər” televiziyasının tanınmış aparıcısı Hacı Nuran Hüseynov müalicəsini Almaniyada davam etdirir. Modern.az-ın məlumatına görə, mayın 20-də jurnalist onu yada salan insanlar haqda danışıb:
”Uca Yaradan bizə seçim verir. Çəkdiyimiz ağrı-acılarda yaxşını pisdən, doğrunu yalandan, dürüst insanları ikiüzlü insanlardan ayıra biliriksə, Allaha min şükürlər olsun. Nə yaxşı ki, bu seçimdə qarşılaşdığım çox yaxşı, vəfalı, mərd, genişürəkli, mərhəmətli, xeyirxah, illərlə sınaqlardan keçən dostlarım daha çoxdur....”.
Jurnalist belə dostlarından birinin – tanınmış qarmon ifaçısı, bəstəkar, Azərbaycanın əmədar artisti Ənvər Sadıqovun onu ziyarət etdiyibi bildidib.
”Belə bir kəlam var: "Bir insanı sevindirmək, Həcc ziyarətinə gedib-gəlmək kimi sayılır"... Ənvər qardaşım da məni dəfələrlə sevindirib, hər zaman ağrılı-acılı günlərimdə mənə maddi və mənəvi dəstək olub...”.
Hacı Nuran Hüseynov bu son dövrlərdə çoxlu stress kecirtdiyini, düşünmək üçün xeyli zamanı olduğunu qeyd edib:
”... Bilirdim, amma bir daha əmin oldum ki, insan üçün ən önəmli və ən vacib amil can sağılığıdır... Mən xəstələnəndən sonra səhhətimin pisləşməsindən indiyə qədər rastlaşmadığım daha çox fərqli anlarla üzləşdim... Dostlarım mənə tezliklə sağalmağımı arzu edirlər, mən də arzu edirəm ki, mənim keçirtdiyim hissləri onlar keçirtməsinlər, heç vaxt xəstələnməsinlər”.
Qeyd edək ki, Hacı Nuranın uzun müddətdir ki, səhhətində ciddi problemlər yaranıb. Almaniyadan əvvəl o, Filippində müalicə almışdı.
Hacı Nuran uzun müddət “Xəzər” telekanalında yayımlanan "Xeyir körpüsü” verilişinin aparıcısı işləyib. Bu veriliş vasitəsilə bir çox xəstə, köməyə ehtiyacı olan insanlara ayrı-ayrı fiziki və hüquqi şəxslər tərəfindən yardım göstərilib, müalicələri təşkil olunub.
A.Qorxmaz
