Modern.az xəbər verir ki, Humanitar Araşdırmalar İctimai Birliyi Prezident yanında Qeyri-Hökumət Təşkilatlarına Dövlət Dəstəyi Şurasının yardımı ilə Beynəlxalq Mətbuat Mərkəzində ““Azərbaycan tarixi-Azərbaycan gəncliyi” tarixi kontekstdən müasir reallıqlara doğru” layihəsi çərçivəsində ali məktəb tələbələri üçün mühazirə-seminar təşkil edib. Toplantını İctimai Birliyin sədri, filologiya üzrə fəlsəfə doktoru Nurlanə Qasımlı açıb.
O bildirib ki, 1918-ci ildə yaranan Azərbaycan Cümhuriyyəti Şərqin ilk demokratik respublikasıdır. Məhz qadınlara da ilk dəfə seçki hüququ verən Azərbaycan Cümhuriyyəti olub. Çıxış edən millət vəkili Azər Badamov bildirib ki, Azərbaycan Cümhuriyyəti yarandıqdan sonra bir sıra islahatlar həyata keçirildi. Bayrağımız təsis edildi, milli bank yaradıldı. Azərbaycan Respublikası Prezidenti yanında Dövlət İdarəçilik Akademiyasının tarix kafedrasının müdiri, əməkdar müəllim, dosent Firdovsiyyə Əhmədova mühazirəsində Cümhuriyyət dövründə keçilən yolu təhlil edib, maraqlı faktları diqqətə çatdırıb. Millət vəkili Qənirə Paşayeva ilk öncə layihənin gənclər üçün yararından bəhs edərək gənclərimizin xüsusən sosial şəbəkələrdə tariximizi, mədəniyyətimizi təbliğ etməyə çağırıb.İştirakçıların suallarına cavab verilib. Daha sonra müzakirələrə yekun vuran millət vəkili, tarixçi professor Musa Qasımlı 1918-1920-ci illər ilə indiki müsatəqilliyimiz arasında paralellər apararaq müstəqil dövləti qorumağın, vətəndaşın fəal olmasının vacibliyi üzərində dayanıb.
