Հայաստանի վարչապետ Նիկոլ Փաշինյանը կայցելի Գերմանիա՝ Հեսսենում շնորհվող Խաղաղության մրցանակը ստանալու համար։
Modern.az-ը հայտնում է, որ այս մասին տեղեկություն է տարածել Գերմանիայի Հեսսեն դաշնային երկրամասի խորհրդարանը։
Նշվում է, որ 51-ամյա քաղաքական գործիչը մրցանակի է արժանացել «երկրում ժողովրդավարական ինստիտուտների ստեղծման և Եվրոպական միության հետ մերձեցման ուղղությամբ իր անխոնջ ջանքերի համար»։
25 հազար եվրոյի չափով մրցանակը 1994 թվականից շնորհվում է Ալբերտ Օսվալդի հիմնադրամի կողմից։
Մրցանակը շնորհվում է բռնության վտանգ պարունակող պատերազմներն ու հակամարտությունները դադարեցնելու, կանխարգելիչ միջոցառումների, բռնի հակամարտությունների կանխարգելման ռազմավարությունների մշակման և միջազգային փոխըմբռնմանը նպաստելու համար։
Հիմնադրամը ստեղծվել է Հեսսենի նախկին վարչապետ Ալբերտ Օսվալդի և նրա ընտանիքի կողմից։ Հիմնադրամի հոգաբարձուների խորհրդի կազմում ընդգրկված են Գերմանիայի խաղաղության հարցերով զբաղվող առաջատար գիտահետազոտական ինստիտուտների ներկայացուցիչներ։ Նրանք խորհրդատվություն են տրամադրում խաղաղության մրցանակի շնորհման հարցերի վերաբերյալ։
Մրցանակաբաշխության արարողությունը տեղի կունենա սեպտեմբերի 18-ին Գերմանիայի Հեսսեն դաշնային երկրամասի խորհրդարանում։
Նշվում է, որ Փաշինյանին այցի ընթացքում կուղեկցի Հայաստանի արտաքին գործերի նախարար Արարատ Միրզոյանը։
Այցի շրջանակներում Հայաստանի կառավարության ղեկավարը նախատեսում է հանդիպել գործարար շրջանակների ներկայացուցիչների հետ Ֆրանկֆուրտի առևտրաարդյունաբերական պալատում և այցելել Դարմշտադտի Ֆրաունհոֆերի կառուցվածքային կայունության և համակարգերի հուսալիության ինստիտուտ։
