ԱՄՆ նախագահ Դոնալդ Թրամփի կողմից որոշ լրատվամիջոցների Սպիտակ տանը աշխատելու սահմանափակումներից հետո հեռուստաընկերությունները որոշել են բոյկոտել Թրամփի միջոցառումները։
Modern.az-ը հայտնում է, որ ըստ BBC-ի տեղեկությունների, սա գնահատվում է որպես ԱՄՆ-ում նախագահի գործունեության աննախադեպ բոյկոտ։
Բոյկոտի որոշումը կայացվել է այն բանից հետո, երբ ուրբաթ օրը Թրամփն արգելել է CNN-ին, “Politico”-ին և MS NOW-ին գործել Սպիտակ տանը։ Նախագահը հայտարարել է, որ այս լրատվամիջոցները իր գործունեությունը լուսաբանում են «բացասական լույսի ներքո»։
Թեև Fox News-ը, ABC-ն, NBC-ն և CBS-ը չեն ենթարկվել արգելքին, նրանք, համերաշխություն ցուցաբերելով իրենց գործընկերների հետ, հայտարարել են, որ չեն լուսաբանի նախագահի միջոցառումները հեռուստատեսությամբ, քանի դեռ սահմանափակումները ուժի մեջ են։
Fox News-ի Վաշինգտոնի բյուրոյի ղեկավար Բրայան Բոուտոնը հայտարարել է.
«Հայտնում ենք, որ այսօրվանից չենք լուսաբանի նախագահի այն միջոցառումները, որոնք նախատեսված են հեռուստատեսությամբ լուսաբանման համար»։
«ԹՐԱՄՓ ԹՎ» Սպիտակ տնից
Միևնույն ժամանակ, Դոնալդ Թրամփի վարչակազմի և մի շարք ամերիկյան լրատվամիջոցների միջև ծագած կոնֆլիկտի ֆոնին, Սպիտակ տունը գործարկել է «ԹՐԱՄՓ ԹՎ. The Essentials Station» անունով առցանց հեռարձակման հարթակ։
Սպիտակ տան կայքում հեռարձակման վերաբերյալ տեղադրվել է հետևյալ արտահայտությունը. «Դիտեք Թրամփի վարչակազմի գործունեության ընթացքում տեղի ունեցած ամենակարևոր իրադարձությունները մեկ տեղում»։
Հեռարձակման նկարագրության մեջ նշվում է, որ ուղիղ հեռարձակումը սկսվել է սեպտեմբերի 21-ին, տեղական ժամանակով ժամը 19:00-ին։
Այսպիսով, Թրամփի վարչակազմի և ԱՄՆ առաջատար լրատվամիջոցների միջև Սպիտակ տուն մուտքի և նախագահական միջոցառումների լուսաբանման շուրջ վեճը նոր փուլ է մտել։
