ԱՄՆ նախագահ Դոնալդ Թրամփը մոտ օրերս կարող է որոշում կայացնել Իրանի դեմ միջուկային զենք կիրառելու մասին։
Modern.az-ը հայտնում է, որ այս մասին իր սոցիալական ցանցի էջում գրել է ամերիկացի քաղաքական մեկնաբան և լրագրող Թաքեր Կարլսոնը։
Կարլսոնը պնդել է, որ Իսրայելի վարչապետ Բենյամին Նեթանյահուն լուրջ ճնշում է գործադրում Թրամփի վարչակազմի վրա՝ փորձելով հարվածել Իրանի միջուկային օբյեկտներին։
Նրա խոսքով, հնարավոր հարձակման հիմնական թիրախը կարող է լինել Իրանի կենտրոնական մասում գտնվող և «Pickax Mountain» անունով հայտնի ստորգետնյա օբյեկտը։ Իսրայելական հետախուզությունը պնդում է, որ այդ տարածքում վերսկսվել է ուրանի հարստացման ծրագիրը։
Լրագրողը նշել է, որ օբյեկտի մոտ 90 մետր հաստությամբ գրանիտե ապարների տակ գտնվելը դժվարացնում է դրա ոչնչացումը սովորական զենքերով։ Կարլսոնի պնդմամբ, հենց դրա համար է Նեթանյահուն փորձում օրակարգ բերել միջուկային հարվածի տարբերակը։
Նա, հղում անելով տեղեկացված աղբյուրին, նաև պնդել է, որ Իսրայելի վարչապետն այս հարցով ամեն օր զանգահարում է Թրամփին։
Կարլսոնը կարծում է, որ Նեթանյահուի դիրքորոշումը կապված է Իսրայելում վերջին խորհրդարանական ընտրություններից հետո ստեղծված քաղաքական իրավիճակի հետ։ Նրա պնդմամբ, Նեթանյահուն դժվարանում է Քնեսեթում կառավարություն կազմելու համար անհրաժեշտ 61 պատգամավորի աջակցությունն ապահովել և Թրամփի քաղաքական միջամտության կարիքն ունի։
Լրագրողը նաև պնդել է, որ ԱՄՆ պաշտպանության նախարար Փիթ Հեգսեթը և Կենտրոնական հրամանատարության ղեկավար Բրեդ Կուպերը դեմ են Իրանի հետ բանակցությունների միջոցով համաձայնության հասնելուն։
Կարլսոնի խոսքով, Թրամփը միջուկային զենքի կիրառման վերաբերյալ իր որոշումը կարող է կայացնել մինչև նոյեմբերի 7-ը։
Այնուամենայնիվ, լրագրողը նշել է, որ ԱՄՆ փոխնախագահ Ջեյ Դի Վենսը և նախագահի հատուկ ներկայացուցիչ Սթիվ Ուիթքոֆը պաշտպանում են դիվանագիտական լուծման տարբերակը։
Կարլսոնը նաև զգուշացրել է հնարավոր միջուկային հարձակման հետևանքների մասին։ Նրա կարծիքով, նման քայլը կարող է հանգեցնել Մերձավոր Արևելքում հումանիտար և բնապահպանական աղետի, համաշխարհային էներգետիկ շուկաներում լուրջ ճգնաժամի և միջուկային զենքի կիրառման տարածման այլ հակամարտություններում։
Նա պնդել է, որ իրադարձությունները կարող են վերածվել ավելի լայնամասշտաբ համաշխարհային պատերազմի՝ կոչ անելով միջազգային հանրությանը դիրքորոշում հայտնել հնարավոր էսկալացիայի դեմ։
