Իրանի Գերագույն առաջնորդի միջազգային հարցերով խորհրդական Ալի Աքբար Վելայաթին խիստ քննադատել է Հայաստանի կողմից «Թրամփի երթուղի» (TRIPP) նախագծին աջակցելը և հայտարարել, որ այս հարցի վերաբերյալ Թեհրանի դիրքորոշումն անփոփոխ է։
Modern.az-ը հայտնում է, որ Վելայաթին այս մասին գրել է «Բաց և անկեղծ ուղերձ վարչապետին» վերնագրով իր հոդվածում։
Նա քննադատել է Հայաստանի վարչապետ Նիկոլ Փաշինյանի քաղաքականությունը՝ նշելով, որ «Թրամփի երթուղու» ընդունումը Հայաստանի ժողովրդի համար ամոթալի քայլ է։
Վելայաթին հիշեցրել է, որ Իրանը դեմ է Զանգեզուրի միջանցքի ստեղծմանը, և այս դիրքորոշումը երկրի բարձրագույն ղեկավարության կողմից սահմանված «կարմիր գիծն» է։
Նա նշել է, որ նախազգուշացրել է նաև Հայաստանի դեսպանին Թեհրանում.
«Եթե Թրամփը և նրա դաշնակիցները ցանկանան անցնել Իրանի այս «կարմիր գիծը», մենք կկոտրենք նրանց ոտքերը»։
Վելայաթին նշել է, որ Իրանը Հարավային Կովկասի անվտանգությունը պահպանելը համարում է իր պատասխանատվությունը՝ Ռուսաստանի հետ կամ առանց Ռուսաստանի։
Նրա խոսքով, Փաշինյանի վերջին քայլերը Հայաստանի հարաբերությունները Ադրբեջանի, Իրանի և Թուրքիայի հետ դարձնում են անկայուն և անկանխատեսելի։
Նշենք, որ Հայաստանի խորհրդարանն անցյալ շաբաթվա վերջին հաստատել է «Թրամփի երթուղի» նախագծի կառուցման վերաբերյալ առաջարկը։ Վելայաթին այս որոշումը գնահատել է որպես Փաշինյանի կառավարության անարդյունավետ և Հայաստանի շահերին հակասող քայլ։
