Son zamanlar Ermənistan-Azərbaycan şərti sərhədinin müxtəlif istiqamətlərində Ermənistan silahlı qüvvələrinin canlı qüvvəsi, zirehli texnikası, artilleriya qurğuları, habelə digər ağır atəş vasitələrinin cəmləşdirilməsi və qoşunların intensiv hərəkəti müşahidə olunur.
Qeyd olunub ki, son vaxtlar Ermənistanda Azərbaycanı müharibə ilə hədələyən revanşist qüvvələrin daha da fəallaşması, ölkəmizə qarşı aqressiv ritorikanın yüksək həddə çatması və təxribat cəhdlərinə hazırlıq məqsədilə informasiya məkanında vəziyyətin gərginləşməsinə xidmət edən təhrikçi məlumatların sayının artması özünü büruzə verir.
Bununla bağlı olaraq Azərbaycan Müdafiə Nazirliyi də Ermənistana xəbərdarlıq edib.
"Xəbərdarlıq edirik ki, Ermənistan silahlı qüvvələri tərəfindən Azərbaycana qarşı hər hansı hərbi təxribat cəhdi olarsa, onun qarşısı Azərbaycan Ordusu tərəfindən qətiyyətlə alınacaqdır. Bir daha bəyan edirik ki, vəziyyətin gərginləşməsinə və baş verə biləcək hər hansı təxribata görə bütün məsuliyyət tamamilə Ermənistan və onun havadarlarının üzərinə düşəcəkdir", - açıqlamada bildirilir.
Ermənistan yeni təxribata hazırlaşır?
İrlandiyalı tarixçi və politoloq Patrik Uolş Modern.az-a bildirib ki, sərhəddə erməni qüvvələrinin yığılması ilə bağlı xəbərlər təəssüf doğurur:
“Bu, təbii ki, gərginlik vəziyyətinin yaradılması ilə bağlı atılan addımdır. Narahatlıq ondan ibarətdir ki, İrəvan 2020-ci ilin noyabr ayında ağrılı məğlubiyyətlərdən sonra simvolik qələbəyə can atır. Erməni mediası mütəmadi olaraq qüvvələrinin yenidən qurulması və hərbi qabiliyyətlərini nümayiş etdirməli olduğu mesajını verir. Onlar hazırda Fransa ilə silah müqavilələri və Qərbin görünən diplomatik dəstəyi ilə həvəsləndirilib. Niyyət müdafiə xarakterli ola bilər, olmaya da bilər. Lakin sülhün bərqərar olmadığı bir vəziyyətdə həmişə alovlanmanın itkilərlə nəticələnməsi ehtimalı var.
Həqiqətən də heç kimə faydası olmayan və sülhü daha da aşağı salan bu təhlükəli “qılınc cingildəməsindən” daha çox, hər iki tərəf arasında kommunikasiya kanalları qurulmalı və etimad gücləndirici tədbirlər görülməlidir”.
