Qazaxın işğal altındakı 4 kəndinin Azərbaycana qaytarılmasından sonra (Bağanis Ayrım, Qızılhacılı, Aşağı Əskipara və Xeyrimli) “esklavlar məsələsi necə həll ediləcək” sualı aktuallaşıb. Xüsusilə də bizim üçün “Başkəndin taleyi necə olacaq” məsələsi vacibdir.
Modern.az-ın məlumatına görə, siyasi təhlilçi Asif Nərimanlı deyib ki, esklavların qaytarılmasında iki problemli məqam var:
“Birincisi, Qazaxın esklav olan üç kəndinin (Yuxarı Əskipara, Bərxudarlı və Sofulu) və Sədərək rayonunun Kərki kəndinin qaytarılması üçün dəhlizlərə ehtiyac var: Azərbaycan və Ermənistan cəmiyyəti arasında etimad mühitinin olmadığını nəzərə alsaq, cari dövrdə belə dəhlizlərin açılması təhlükəsizliyin üçüncü qüvvə tərəfindən təmin edilməsi zərurətini yaradır. Amma nə Bakı, nə də İrəvan bunda maraqlıdır;
İkincisi, Ermənistanın Başkəndi “öz esklavı” hesab etməsi və 4 anklava qarşı bu ərazini istəməsidir. Halbuki, Başkənd Azərbaycan torpağıdır və SSRİ dövründə digər ərazilərimiz kimi “otlaq və əkin sahəsi” adı altında ermənilərə bağışlanıb. Digər tərəfdən, bu kəndin strateji əhəmiyyəti onun qaytarılmasının Azərbaycana təkcə coğrafi yox, hərbi baxımdan da itkilər vəd edir.
Bu vəziyyət “anklavlar məsələsi necə həll edilməlidir” sualını ön plana çıxarır”.
A.Nərimanlı deyib ki, həll yollarından biri ərazilərin mübadilə formasıdır (Başkənd bizdə qalır, Qazaxın üç kəndi və Kərki ermənilərdə):
“Ermənistan bunda maraqlıdır, Paşinyan “dəhlizlər” məsələsinin çətinliyini əsas gətirərək, bu təkliflə çıxış etmişdi. Lakin məsələ təkcə “dəhliz çətinliyi” ilə məhdudlaşmır.
- İrəvan anlayır ki, Başkəndi alsalar da, erməni əhalisinin orada yaşaması qeyri-mümkün olacaq: SSRİ dövründə kənddə yaşamış ermənilər geri qayıtmaq istəmədiklərini bildiriblər;
- Kərki kəndi Azərbaycana Ermənistanın Şimal-Cənub magistral yoluna, Qazaxın üç kəndi isə Ermənistan-Gürcüstan magistral yoluna nəzarət etmək imkanı verir;
Ermənistan həm də buna görə “barter”in tərəfdarıdır. Lakin Azərbaycan üçün bu o qədər də məqbul deyil”.
Ekspertin sözlərinə görə, müharibədə qalib gəlmiş Azərbaycan öz tarixi torpağı olan Başkəndi verməməklə yanaşı, 4 esklav kəndin azad edilməsi strategiyasından da imtina etməməlidir;
Çünki Kərki və Qazaxın üç kəndinin azad edilməsi bizə həm də strateji üstülük qazandıra bilər:
“Bu baxımdan, anklavlar məsələsinin sonrakı dövrə saxlanılması daha məqbul variantlardan biri kimi görünür. Bunun üçün Qazaxın esklav olmayan 4 kəndinin qaytarılmasında qəbul edilən Alma-Ata bəyannaməsi - İrəvanın istədiyi “Sərhəd SSRİ dağılanda mövcud xətlər üzrə çəkilsin” prinsipi sərhədin digər hissələrinin delimitasiyasında əsas götürülməməlidir. 19 aprel razılaşması Azərbaycana bu imkanı verir. Başkəndi vermədən, Kərki və Qazaxın üç kəndinin azad edilməsinin yollarından biri Azərbaycanın Ermənistan üzərindəki üstünlüyündən istifadə etməsidir: sülh sazişi bağlana, sərhədin müəyyənləşməsi hissə-hissə aparıla və bu müddətdə rəsmi İrəvanın marağında olacaq təkliflər irəli sürülə bilər. Misal üçün, bu kəndlərə iqtisadi yatırımların edilməsi, yaxud Ermənistanın regional layihələrə qoşulması və s. Mövcud vəziyyətdə Başkəndin gündəmə gətirilməsinə lüzum yoxdur”.
