Mayın 25-26-da “Qala” Dövlət Tarix-Etnoqrafiya Qoruğunda “Qədim el sənətləri” adlı festival keçiriləcək.
“Azərbaycan Televiziya və Radio Verilişləri” QSC-nin mətbuat xidmətindən verilən məlumata görə, tədbir Azərbaycan Xalq Cumhuriyyətinin yaranmasının 100 illiyi çərçivəsində Prezident İlham Əliyevin 16 may 2017-ci il tarixli sərəncamın uyğun olaraq nəzərdə tutulub.
Rəsmi qonaqların çıxışları ilə başlanacaq festivalda musiqi kollektivləri, əl işləri və kitab satış-sərgisi, zorxana tamaşası, milli geyimlər, milli rəqslər, aşıq havaları, xına qrupu, muğam üçlüyü, dulusçuluq, nalbəndlik, interaktiv oyunlar, xalça toxuma və bu kimi nümunələr nümayiş etdiriləcək.
Saat 15.00-da qapılarını tamaşaçıların üzünə açacaq festivalın təşkilatçıları AMEA-nın Arxeologiya və Etnoqrafiya İnstitutu ilə Azərbaycan Televiziyasının nəzdindəki “Mədəniyyət” kanalıdır.
Festivalın kuratoru “Mədəniyyət” telekanalının “Xalq yaradıcılığı” redaksiyasının baş redaktor müavini, tarix elmləri doktoru Güllü Yoloğludur.
