Milli Məclisin üzvü Qənirə Paşayeva ABŞ-da bu ölkədə səfərdə olan Türkiyə Parlamentinin 12 millət vəkilinin təmsil olunduğu nümayəndə heyəti ilə görüşüb. Modern.az-ın məlumatına görə, ABŞ-da səfərdə olan deputat Hyustonda keçirilən Türkidilli Ölkələrin Böyük İpək Yolu Festivalı çərçivəsində Türkiyəli deputatlarla görüş keçirib. Q.Paşayeva həmçinin Türkiyənin Mədəniyyət nazirinin müavini Abdurrahman Arıcının təmsil olunduğu nümayəndə heyəti ilə görüşüb və fikir mübadiləsi aparılıb.
Azərbaycanın inkişaf etməsindən sevindiklərini deyən Türkiyə millət vəkilləri iki qardaş ölkə arasında bütün sahələrdə münasibətlərin daha da inkişafından məmnunluqlarını söyləyiblər. Türkiyənin daim Azərbaycanın yanında olacağını deyən TBMM üzvləri Dağlıq Qarabağ probleminin həllində Azərbaycanın haqlı mövqeyini bundan sonra da bütün platformalarda geniş şəkildə dəstəkləyəcəklərini deyiblər. Millət vəkili, Azərbaycan-Türkiyə Parlamentlərarası Dostluq qrupunun üzvü Qənirə Paşayeva Azərbaycan və Türkiyə bir millət iki dövlətdir fikirini qeyd edərək Azərbaycanın da daim qardaş Türkiyənin yanında olduğunu deyib.
Görüş zamanı bir sıra məsələlər ətrafında fikir mübadiləsi aparılıb. Vurğulanıb ki, dünyanın hər yerində, o cümlədən ABŞ-da Azərbaycan həqiqətlərinin daha geniş yayılması, qondarma “erməni soyqırımı” yalanlarının qarşısının alınması istiqamətində diasporumuzla birlikdə səylərimizi daha da artırmalıyıq. Görüşdə iştirak edən ABŞ-da fəaliyyət göstərən bir sıra türk diaspor təşkilatları rəhbərləri ilə fikir mübadiləsi zamanı millət vəkilləri bu ölkədə yaşayan türk kökənli insanların sayının getdikcə daha da artmasının səsimizin Amerika ictimaiyyətinə daha geniş çatdıra bilməyimiz üçün böyük bir potensial olduğu, səylərin birləşdirilməsinin və gücləndirilməsinin vacibliyini vurğulayıblar.
Qənirə Paşayeva görüş zamanı ABŞ-da yaşayan, dünyanın müxtəlif coğrafiyalarından bu ölkəyə gəlmiş Türk kökənli insanların və onların təşkilatlarının koordinasiya olunmuş şəkildə, bir-birlərinə sıx dəstək vermələrinin və Türk dünyasını narahat edən bütün problemlərin həllinə dəstək göstərmək üçün bərabər çalışmalarının daha da artırılmasının vacibliyini də diqqətə çatdırıb.
Görüşdə qarşılıqlı maraq doğuran məsələlər ətrafında geniş fikir mübadiləsi aparılıb.
Modern.az
