"Putinin Ukraynaya müdaxiləsi Litvanın müdafiə siyasətini dəyişməyib. Bu, bizim düzgün istiqamətdə getdiyimizi sübut etdi".
Modern.az xəbər verir ki, bu barədə Litvanın müdafiə naziri Arvidas Anuşauskas bildirib.
Onun sözlərinə görə, Litva Silahlı Qüvvələrinin döyüş hazırlığının səviyyəsi yüksəlib - bəzi bölmələr bir neçə saatdan sonra fəaliyyətə başlaya bilər, həmçinin ölkədə çağırışçıların sayının artırılması nəzərdə tutulurdu.
Eyni zamanda, nazir qeyd edib ki, Ukraynanın daimi dəstəyinə görə (Litva artıq 100 milyon avrodan çox yardım edib. Bunlar əsasən öldürücü silahlardır-red) Litva Silahlı Qüvvələrində silahların tükənməsi problemi də həll edilməlidir.
"İndi əksər müttəfiqlər bununla üzləşirlər. Biz bütün ehtiyacları vaxtında ödəmək üçün müdafiə sənayesi ilə yaxından işləməliyik. Biz beş və ya on ildən sonra deyil, bu gün tam təchiz olunmaq üçün mümkün olan hər şeyi etməliyik", - Anusauskas deyib.
O, eyni zamanda vurğulayıb ki, başlıca məqsəd Litvada NATO və ABŞ qüvvələrinin mövcudluğunu artırmaqdır.
"Biz ev sahibi ölkəni dəstəkləmək potensialını gücləndiririk - yeni hərbi infrastruktur və poliqon tikirik, mövcud infrastrukturu təkmilləşdiririk. Bu prioritet təkcə Silahlı Qüvvələr üçün deyil, həm də hökumət üçün çox vacibdir. Biz çox yaxında əlavə minlərlə NATO əsgərini qəbul etməyə hazır olacağıq”, - Anusauskas vurğulayıb.
