Müharibənin başlanmasından bəri Hörmüz boğazından keçən gəmilərin sayı 95%-dən çox azalıb.
Modern.az bu barədə London Fond Birjası Qrupu və Kpler-in gəmi izləmə məlumatlarına əsasən xəbər verir.
Qeyd edilib ki, 28 fevral – 12 aprel tarixləri arasında boğazdan cəmi 279 gəmi keçib. Halbuki münaqişədən əvvəl gündəlik orta göstərici təxminən 100 gəmi idi.
ABŞ ilə İran arasında 8 apreldə qüvvəyə minən atəşkəsə baxmayaraq, vəziyyət stabilləşməyib. Belə ki, həmin tarixdən sonra boğazdan cəmi 45 gəmi daxil olub və ya çıxıb.
Ekspertlər bildirir ki, müharibə nəticəsində yüzlərlə tanker və digər yük gəmisi Körfəz sularında hərəkətsiz qalıb. Bu isə qlobal neft və qaz tədarükünün təxminən 20% azalmasına səbəb olub və son illərin ən böyük enerji təchizatı kəsintilərindən biri kimi qiymətləndirilir.
Bununla yanaşı, döyüşlər Körfəz regionundakı enerji infrastrukturuna da zərbə vurub. Nəticədə dünya bazarlarında neft qiymətləri müharibənin əvvəlindən bəri təxminən 50% artıb. Ən çox zərər görənlər arasında isə Asiya ölkələrinin iri enerji idxalçıları yer alır.
Kpler-in məlumatına görə, münaqişə başlayandan indiyədək Hörmüz boğazı və ətraf sularda 22 gəmi hücuma məruz qalıb. Hücumların coğrafiyası genişdir: BƏƏ sularında 8, Oman-da 6, İraq və Qətər sularında hər birində 2, Bəhreyn, Küveyt, Səudiyyə Ərəbistanı və İran sularında isə hərəsində 1 insident qeydə alınıb.
